O movemento ecoloxista e o sector do mar organizan a Manifestación en Defensa do Mar, o domingo 21 de xaneiro, con saída ás 12.00 horas desde a Alameda de Santiago e con finalización na Praza do Obradoiro. Desde Compostela Aberta apoiamos esta mobilización e animamos a toda a cidadanía a participar nela como acto de protesta e de desconformidade coa actuación da Xunta de Galicia na xestión desta crise.
Fronte á situación creada pola chegada masiva de materiais plásticos ás costas galegas e diante dos potenciais riscos para a saúde e o medio ambiente, facemos nosas as reivindicacións dos colectivos convocantes e unímonos á denuncia pública sobre a tardanza e o desleixo do goberno galego en facer fronte a ésta ameaza.
Novamente, como xa acontecera na catástrofe do Prestige, tiveron que ser os colectivos cidadás e as persoas voluntarias as que, en ausencia das institucións, saímos ás praias a loitar contra esta marea plástica.
Reclamamos tamén transparencia na información ao público sobre a toxicidade dos materiais e os seus efectos sobre a saúde e os ecosistemas mariños. E exiximos da Xunta de Galicia que actúe con contundencia e celeridade para que esta catástrofe e a dispersión destes microplásticos polo noso litoral non vaia a máis.
En defensa do noso mar, mentiras e incompetencia NUNCA MÁIS.
