Compostela Aberta volverá pedir explicacións polo peche do Rexistro Auxiliar do Ensanche, “que o Goberno negou en xaneiro, en resposta a unha pregunta de CA, pero que recoñeceu posteriormente no decreto no que ditou o traslado a outro departamento da funcionaria que atendía o servizo”. A concelleira María Rozas lamentou “non só que se desmantele un servizo clave para a veciñanza xusto cando o Rexistro Xeral está desbordado, senón tamén a escasa transparencia do Goberno de Bugallo, que non está a informar con claridade sobre a situación e sobre os seus plans para o Rexistro Auxiliar do Ensanche”.
María Rozas lembrou que as primeiras informacións sobre o peche do Rexistro Auxiliar do Ensanche remóntanse xa a novembro de 2020”. Despois da denuncia dunha central sindical ao respecto, Compostela Aberta presentou unha pregunta por escrito, que o Goberno respondeu en xaneiro sinalando que “non se pechou o Rexistro do Ensanche, o persoal destinado no mesmo segue coas mesmas funcións, e a pretensión deste goberno é dar cumprimento a un acordo do Pleno de prestar maior asistencia á cidadanía para facilitarlle as súas comunicacións co Concello a través da Administración Electrónica”. Meses despois, en maio, a concelleira de Facenda e Persoal ditou o traslado da funcionaria que atendía o servizo, nun decreto que di textualmente “a funcionaria (…) estaba a prestar servizos no Rexistro Auxiliar do Ensanche, e desde o seu peche os vén prestando nas dependencias da oficina de asistencia en materia de rexistro”. Para María Rozas, “o Goberno local recoñece así o peche do Rexistro Auxiliar do Ensanche, que nunca comunicou oficialmente, e dá a entender que a medida non é provisional posto que lle está buscando outro destino á traballadora que o atendía”.
Para a concelleira de Compostela Aberta, “é lamentable o peche dun servizo que é clave para a cidadanía, e que se efectiviza cando o Rexistro Xeral do Concello está desbordado e cando os veciños e veciñas teñen que agardar semanas polas súas citas”. A concelleira insistiu en que “a administración electrónica aínda non é unha solución válida para toda a cidadanía por mor da fenda dixital, e é preciso que se manteña unha alternativa para que estas persoas fagan as súas xestión”.
