Compostela Aberta e BNG iniciaron hoxe as negociacións dun pacto de goberno, despois de que a asamblea de CA se pronunciara onte a favor de explorar a posibilidade de entrar nese executivo de coalición. María Rozas reiterou que “a veciñanza pediunos nas urnas que chegaramos a acordos, e Compostela Aberta tén toda a vontade de facelo, sen dilatar os tempos, e garantindo as políticas progresistas e transformadoras que precisa Santiago”
María Rozas explicou que a primeira reunión entre CA e BNG “serviu para falar dos principais retos e urxencias que tén por diante Santiago, e tamén das propostas que Compostela Aberta entende que hai que afrontar nos próximos anos”. A portavoz municipal mostrouse convencida de que “as conversas van polo bo camiño, queda moito aínda por falar, pero a nosa vontade non é a de dilatar os tempos”. Para Rozas, “estamos obrigadas a escoitar o que nos dixeron os veciños e veciñas o 28 de maio, elixindo unha Corporación de maioría progresista e plural”, e nesa liña defendeu que “todas as forzas da esquerda temos que remar na mesma dirección para termos o mellor goberno, que é o goberno máis amplo”.
A candidata de Compostela Aberta explicou que “a nosa asamblea entendeu onte que o máis responsable para Santiago é que CA entre no Goberno, para garantir as políticas progresistas e transformadoras que precisamos, e nós asumimos ese mandato convencidas de que sempre hai espazo para o consenso”. María Rozas aclarou tamén que calquera pacto de goberno terá que ser novamente refrendado pola asamblea de Compostela Aberta.
