• Marta Lois denuncia “a actitude soberbia do concelleiro Javier Fernández, que debera ser desautorizado polo alcalde”

Compostela Aberta e o BNG levarán ao Pleno da próxima semana unha moción conxunta para reclamar a revisión de oficio dos pregos para a licitación do servizo de xestión da rede dos centros socioculturais. Así o anunciaron hoxe as portavoces dos dous grupos municipais, coincidindo co inicio, hoxe, da folga do persoal dos CSCs. A voceira de CA, Marta Lois, lamentou “a actitude do concelleiro e do propio alcalde, que levan meses ignorando os avisos sobre os erros que contiñan os pregos, e ignorando as demandas dos traballadores e traballadoras”.

A Xunta de Goberno aprobou a finais de outubro a licitación do servizo de xestión da rede de centros socioculturais, cun procedemento dividido en catro lotes. Unha vez avaliada a documentación, Compostela Aberta denunciou en decembro os moitos erros que conteñen os pregos e alertou dos problemas que ía traer a licitación e dos riscos de precarización dos e das traballadoras. Nos últimos cinco meses, foron varias as iniciativas relacionadas cos pregos que os grupos da oposición  levaron ao Pleno, e de feito na última sesión mesmo interviu unha representante do persoal para denunciar as incoherencias e incorreccións dos pregos e para avanzar a convocatoria da folga que hoxe comeza. 

Para Marta Lois, “é incomprensible que o concelleiro de Centros Socioculturais manteña a súa actitude soberbia e siga sen falar cos traballadores e traballadoras dos centros socioculturais, e ainda é máis incomprensible que o alcalde siga avalando a Javier Fernández”. A portavoz de Compostela Aberta reiterou que “o Goberno debe rectificar, e revisar de oficio os pregos de cláusulas administrativas da licitación e os pregos técnicos dos catro lotes nos que se dividiu a licitación, para garantir un servizo de calidade para a veciñanza e unhas condicións dignas para os traballadores e traballadoras”.

PODES LER AQUÍ A MOCIÓN CONXUNTA DE CA E BNG PARA INSTAR Á XUNTA DE GOBERNO A REVISAR DE OFICIO DOS PREGOS DE XESTIÓN DA REDE DE CENTROS SOCIOCULTURAIS DE SANTIAGO

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies