Compostela Aberta reclamou hoxe “a máxima contundencia” para facer cumprir as sentenzas xudiciais, a última delas do Tribunal Supremo, que impiden o paso de camións de gran tonelaxe pola pista rural de acceso á canteira de Miramontes. O concelleiro Xan Duro mostrou a súa “sorpresa ante o novo enredo” co que a UTE que xestiona o vertedoiro pretende continuar coa súa actividade, e urxiu á Xunta a “exercer as súas competencias e clausurar as instalacións, porque ese será o xeito definitivo de garantir os dereitos da veciñanza da Grixoa”.
O concelleiro de Compostela Aberta lembrou que “o deber das institucións é garantir os dereitos fundamentais da veciñanza, agredidos durante anos pola actividade da canteira”. Para Xan Duro, “é sorprendente que a UTE que xestiona as instalacións pida agora medidas cautelares para manter a circulación de vehículos pesados, despois de tres anos e medio de litixio xudicial”. O edil lembrou que foron diversas as sentenzas que avalaron a legalidade da resolución para impedir o paso dos camións, que el mesmo asinou durante o pasado mandato municipal, “a última delas a do Tribunal Supremo, en decembro pasado”. Para Xan Duro, “se a empresa tiña vontade de adoptar medidas para limitar as afectacións á veciñanza polo paso dos vehículos, puido telo feito durante estes tres anos e medio no canto de litigar nos xulgados contra os intereses da cidadanía”.
Para Xan Duro, “cada vez hai menos escusas para non actuar con contudencia en Miramontes”. Nesa liña, o concelleiro de Compostela Aberta instou á Xunta a clausurar o vertedoiro canto antes para acabar cos problemas de salubridade que xera na Grixoa, e a devolver a zona ao seu estado orixinal”.
