A portavoz de Compostela Aberta foi moi crítica hoxe coa Xunta de Galicia, despois de que o director da Axencia Galega de Infraestruturas presentara o trazado alternativo da senda ciclable do Milladoiro-Santiago co que sae ao paso das denuncias da veciñanza e dos colectivos ecoloxistas que derivaron na apertura de dilixencias penais por esta actuación, tanto por parte do Xulgado Nº 2 de Santiago como da Fiscalía Anticorrupción Europea. Para María Rozas, “o Goberno galego non mellora a proposta inicial senón todo o contrario, e volve obviar que existen alternativas para esta senda que son absolutamente respectuosas co Banquete de Conxo, que non poñen en risco árbores centenarias como acontece con esta alternativa, e que non pasan por formigonar ao carón do río”.
Sen diálogo coa veciñanza
Rozas cualificou de “incomprensible que a Xunta volva presentar un trazado para a senda ciclista que non foi dialogado coa veciñanza, que hoxe xa manifestou o seu desacordo con esta proposta”. “De nada vale”, engadiu a portavoz de CA, “que o Goberno galego anuncie agora unha xuntanza a posteriori, se non é para escoitar e ter en conta as achegas dos veciños e veciñas”. Ademais, incidiu en que “o director da Axencia Galega de Infraestruturas non pode ampararse en que a tramitación do proxecto foi a correcta porque, á espera de coñecer o que decide a xustiza nas dilixencias abertas, que unha proposta sexa legal non equivale a que sexa a mellor para a súa contorna e para a veciñanza”.
María Rozas adiantou que Compostela Aberta avaliará con detalle o novo trazado, “tendo en conta que as modificacións previstas non mudan substancialmente o impacto na contorna natural”, e non descarta presentar alegacións a este proxecto modificado.
