• A concelleira María Rozas cualifica de “inadmisible que os recortes da Xunta obriguen ao alumnado de só sete anos a ter ata oito profesores distintos”

Compostela Aberta mostrou hoxe o seu apoio á comunidade educativa do CEIP Monte dos Postes, que vén de denunciar que o centro tén que compartir un titor co colexio das Fontiñas, “nun claro exemplo das graves consecuencias que teñen os recortes no Ensino impostos pola Xunta de Galicia”. A concelleira María Rozas cualificou de “inadmisible que a Consellería de Educación non sexa quen de cubrir unha praza vacante, e obrigue a nenos e nenas de só sete anos a teren ata oito profesores distintos”

Tal e como denunciou a ANPA do CEIP Monte dos Postes, a Consellería de Educación non cubriu a praza dunha profesora do centro que se atopa en comisión de servizos, e optou porque o colexio comparta un titor co colexio das Fontiñas. O profesor estará dous días á semana en Fontiñas e tres en Monte dos Postes, e o alumnado de 2º de Primaria deste centro terá ata oito mestres distintos que cubrirán as horas de ausencia do titor. Para María Rozas, “finalmente serán os nenos e nenas os que paguen as consecuencias dos recortes da Xunta de Galicia, que repercuten directamente na calidade do ensino”. A concelleira mostrou o total apoio de Compostela Aberta ás reivindicacións da comunidade educativa do centro, e instou á Consellería de Educación a rectificar canto antes “unha decisión que non se entende, e menos en tempos de pandemia cando se adoptan medidas excepcionais para minimizar os contactos entre o alumnado”.

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies