- A empresa ameaza con considerar laborais todos os días da semana, e a establecer turno partido para todas as traballadoras con xornada continua
Compostela Aberta vén de trasladarlle o seu apoio ao persoal do Servizo de Axuda no Fogar, que estuda posibles mobilizacións diante da intención da empresa de empeorar sensiblemente as súas condicións laborais. A portavoz municipal, María Rozas, e a concelleira Marta Lois mantiveron unha xuntanza cunha representación das traballadoras, que non descartan a convocatoria dunha folga en maio. Para CA, “é inadmisible que Servisar pretenda precarizar aínda máis a estas mulleres, que prestan un servizo moi sensible, que é de titularidade municipal”.
O persoal do SAF vén de denunciar que a empresa concesionaria do servizo informou onte da súa intención de modificar as súas condicións laborais, “con medidas que suporán graves prexuízos para as traballadoras”. Así, a proposta que Servisar lles entregou por escrito recolle unha nova distribución da xornada pola que pasarían a ser laborais todos os días da semana de luns a domingo cos descansos legais recoñecidos pola normativa; o establecemento do turno partido para o persoal que estaba con xornada continua, e a redución do 25 por cento da xornada para as traballadoras contratadas a tempo parcial.
Mediación do Goberno local
María Rozas volveu reclamar a mediación do Goberno local, “porque o acontecido onte é a gota que colma o vaso, despois de moitos meses de conflito no Servizo de Axuda no Fogar, de moitos meses de queixas das traballadoras ante a pasividade do alcalde e da concelleira Mila Castro”. A portavoz municipal de CA e a concelleira lembraron que “xa houbo unha xornada de folga das traballadoras en febreiro, sen ningunha reacción por parte do Goberno, e en xaneiro, o PSOE abstívose no Pleno na votación dunha moción de Compostela Aberta exisindo o cumprimento das condicións sociolaborais das traballadoras, unha abstención que deixou ben claro que a súa intención é manterse á marxe de calquera conflito”.
Rozas e Lois reclamáronlle ao Goberno “que explique cales son as circunstancias polas que a empresa modifica as condicións laborais das traballadoras, tendo en conta que Servisar insiste na súa comunicación ao persoal na responsabilidade do Concello e das persoas usuarias pola súa inflexibilidade para mover os horarios de prestación dos servizos”.
Compostela Aberta lembra que o conflito no Servizo de Axuda do Fogar non é novo, que as 200 traballadoras do servizo non están cobrando as subidas correspondentes ao IPC de 2021 e 2022, tal e como lles correspondería por convenio, “o que supón deixar de cobrar entre 100 e 150 euros mensuais, “unha cantidade moi importante cando falamos de salarios que rozan os mil euros”.
