• O  grupo municipal de CA reclama tamén unha mesa de diálogo co tecido social de Santiago para acordar as medidas para a recuperación tras a pandemia

Compostela Aberta pedirálle ao alcalde a creación dunha comisión especial que impulse un Plan de Rescate Social para Santiago tras a crise do coronavirus, na que estean representados todos os grupos da corporación municipal. Así se recolle nunha proposición que a concelleira Marta Lois defenderá no Pleno ordinario de mañá, e na que tamén se insta ao Goberno a impulsar unha mesa de diálogo co tecido social de Compostela, para que sexa partícipe da elaboración e implementación das medidas acordadas.

A concelleira Marta Lois avogou porque “o conxunto da Corporación, Goberno e oposición, colaboren na planificación dun Plan de Rescate Social que garanta os dereitos sociais de toda a cidadanía de Santiago tras a crise da Covid-19”. Esa colaboración, engadiu, debe materializarse a través dunha ferramenta contemplada no regulamento orgánico do Pleno, que no seu artigo 121.4 fala da creación das “comisións informativas, de estudo ou proposta de carácter especial para a consulta ou seguimento dun programa, expediente ou asunto determinado cuxa importancia ou complexidade o aconselle”. Para Marta Lois, “esta comisión sería o insturmento institucional acaído para colocar o público como elemento de cohesión social e de protección para as persoas máis desfavorecidas”.Nesa liña, a concelleira sinalou que o Plan de Rescate Social “debe procurar medidas que poñan o foco nas políticas sociais, nos coidados e na conciliación; e tén que atender tamén á recuperación do emprego, á procura dun novo modelo turístico e á reactivación do Plan de Reindustrialización de Santiago”.Ademais das competencias municipais, Compostela Aberta entende que a Comisión de Estudo debe ser o órgano a través do que se canalicen as demandas a outras administracións,  “nomeadamente á Xunta, que debera poñer en marcha unha Mesa municipal e social galega na que coopere cos concellos e cos representantes sociais para combater a situación de emerxencia sanitaria e social”.

Diálogo co tecido social

Na proposición que se debaterá no Pleno ordinario de mañá, Compostela Aberta tamén reclama a creación dunha Mesa de diálogo social con representantes das centrais sindicais e do tecido empresarial e comercial da cidade. Esa ferramenta, apunta Marta Lois, “debe servir para manter unha información constante co tecido social, pero tamén e sobre todo para recoller as súas demandas e consensuar medidas de rescate fronte ás consecuencias socioeconómicas da pandemia da Covid-19”.

Marta Lois lembrou que “desde o comezo desta crise, Compostela Aberta vén mantendo unha actitude colaborativa e propositiva, pensando no interese das persoas”. Nesa liña, o grupo municipal tenlle presentado ao Goberno local diferentes documentos de propostas, tanto de accións urxentes para afrontar a pandemia como de medidas para recuperar sectores estratéxicos para Santiago como o pequeno comercio e a hostalería, o turismo, ou a cultura.

PODES CONSULTAR AQUÍ A PROPOSICIÓN DE CA PARA A CREACIÓN DUNHA COMISIÓN ESPECIAL DE ESTUDO QUE IMPULSE UN PLAN DE RESCATE SOCIAL

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies