- O Concello pode instar á Xunta a aprobar a declaración provisional e, no prazo de dous anos, elaborar un Plan de Protección do Souto de cara á declaración definitiva como ENIL
- Jorge Duarte lembra que o Souto “ten un enorme valor natural, patrimonial, arqueolóxico e etnográfico que é preciso protexer”
Compostela Aberta levará ao próximo Pleno da Corporación unha moción na que pide que o Concello de Santiago inste á Xunta a declarar O Souto como Espazo Natural de Interese Local e que o órgano municipal competente elabore e presente o plan de conservación deste espazo. O concelleiro Jorge Duarte lembrou que a área do Souto “tén un enorme valor patrimonial, arqueolóxico e etnográfico, ademais de natural, que é preciso protexer fronte a ameazas como a que no seu día supuxo a do proxecto da nova depuradora de Santiago”.
Jorge Duarte explicou que a declaración dun espazo natural de interese local é competencia da Xunta, a través da Consellería de Medio Ambiente, tal e como se regula na Lei de Conservación da Natureza de 2001. Esa normativa foi desenvolvida nun Decreto de 2005, que recolle a posibilidade de que “a petición dun concello, a Consellería aprobe a declaración do espazo natural de interese local de xeito provisional, por un prazo non superior a dous anos. Dentro dese prazo, o concello promotor deberá presentar o plan de conservación do espazo”.
Carballeiras, fauna protexida e patrimonio etnográfico
O concelleiro apuntou que Santiago “non conta con ningún espazo natural con este nivel de protección, e O Souto cumpre todosos requisitos para ser o primeiro”. Nesa liña, Duarte lembrou que nesta zona situada entre Laraño e Villestro “concéntranse catro carballeiras, charcas oligotróficas, eutróficas, e brañas; viven tres especies de fauna protexidas como a papuxa do mato, a lontra e o caracol de Quimper; e conta cun importante patrimonio etnográfico”.
O edil de Compostela Aberta apuntou que o Concello de Santiago encargou en febreiro de 2018 un estudo para a valoración ecolóxica do Souto, no que se apunta que “sería preciso profundizar na descrición e estudo das carballeiras e nas comunidades de flora e fauna deste espazo, así como mellorar a protección e conservación dos seus elementos”. O informe tamén suxire “incrementar o valor ecolóxico do monte do Souto mediante traballos de restauración ecolóxica que reforcen a función deste ecosistema como cortalumes natural e como refuxio de biodiversidade. Jorge Duarte lembrou que “estes informes avalan a aposta que fixo o Goberno de Compostela Aberta para que a nova EDAR se constrúa na localización da actual depuradora da Silvouta, unha aposta que se está materializando nun proceso que ACUAES xa tén avanzado”. Ao tempo, lembrou que “foi o acordo entre o alcalde Bugallo e o entón conselleiro Agustín Hernández o que posibilitou que o PP puxera en risco o Souto co proxecto da nova EDAR, un acordo que ambos alcanzaron antes das eleccións de 2011 por intereses unicamente electoralistas”
Por todo iso, a moción de Compostela Aberta pídelle ao Concello de Santiago que inste á Xunta de Galicia a declarar O Souto como Espazo Natural de Interese Local (ENIL) de xeito provisional, e insta tamén ao órgano municipal competente a elaborar e presentar, nun prazo non superior a dous anos desde a declaración provisional, o plan de conservación deste espazo de cara ásúa declaración definitiva como Espazo Natural de Interese Local.
