- María Rozas lembra que “fixar poboación no rural de Santiago pasa por ofrecer servizos, e neste caso estamos diante dunha cuestión de vontade e non de orzamento”
A portavoz municipal de Compostela Aberta pediulle hoxe ao Goberno local que medie para que a empresa concesionaria do transporte escolar atenda as demandas das familias de Santa Cristina de Fecha, que levan meses reclamando un cambio de itinerario para habilitar unha parada no núcleo de Frensa”. María Rozas, que vén de manter unha xuntanza coa veciñanza da parroquia, explicou que “unha pequena modificación que para o autobús non suporía máis que engadir uns minutos ao seu percorrido evitaría que dous nenos do núcleo de Frensa teñan que camiñar case un quilómetro e medio por un viario claramente inseguro, porque nin tén beirarrúas nin iluminación”. Para a portavoz de CA, “estamos diante dun caso que se resolvería cun mínimo de vontade, en primeiro termo da concesionaria, e en segundo da administración autonómica, que é quen tén as competencias en materia de transporte escolar”.
Na reunión celebrada en Santa Cristina de Fecha, a veciñanza mostrou o seu malestar pola situación que viven dous nenos, e 5 e 11 anos, escolarizados por cuestión de proximidade no CEIP Plurilingüe Xacinto Amigo Lera, de Val do Dubra. Os menores viven no lugar de Frensa, pero a parada do bus escolar máis cercana que lle ofrecen a Xunta e a concesionaria é a do lugar de Belén. Isto obrigaríaos a camiñar case un quilómetro e medio, “por un viario que non tén nin beirarrúas nin iluminación, e nas condicións metereolóxicas que adoitan acompañar o curso escolar en Galicia”. Por este motivo, a familia non tén máis remedio que trasladar polos seus propios medios aos nenos ao centro escolar “coas dificultades que iso supón en termos de conciliación, habida conta de que os horarios escolares son incompatibles cos de moitos traballos” A portavoz de Compostela Aberta lamentou “a actitude que vén mostrando a empresa concesionaria diante das reclamacións das familias, que lembran que a día de hoxe non hai crianzas escolarizadas que utilicen a parada de Belén, mentres sí hai demanda para unha pequena modificación do itinerario que para a empresa non suporía nin grandes custos económicos nin unha importante alteración dos horarios das rutas”. Para María Rozas, “esta é unha mostra máis do modus operandi da concesionaria do transporte escolar, da que as familias levan dando queixas durante todo o que levamos de curso en diferentes centros da comarca de Santiago, sen que haxa ningunha reacción por parte da Xunta de Galicia”.
A portavoz de CA pediulle ao Goberno local que atenda a situación destas familias de Santa Cristina de Fecha e exerza presión sobre a empresa e sobre a administración autonómica, “porque esta sería tamén unha mostra de compromiso coa veciñanza das parroquias de Santiago que vimos de asumir todos os grupos da Corporación coa sinatura do Pacto polo Rural”. Para María Rozas, “é evidente que a falta de servizos é un dos motivos polos que as parroquias se baleiran de habitantes, e ainda que hai cuestións que son enormemente custosas para as administracións, outras coma esta terían unha solución rápida se existira vontade real das administraicóns públicas”.
