Marta Lois visitou o “verderón” co presidente da Asociación de Amigos de Ferrocarril, Carlos Abellán

  • Marta Lois visitou o vagón para recoller as demandas da Asociación Compostelá de Amigos do Ferrocarril

Compostela Aberta pedirá no Pleno que o Concello colabore coa Asociación Compostelá de Amigos do Ferrocarril para instar a ADIF e á Fundación dos Ferrocarrís Españois para a rehabilitación, conservación e mantemento do vagón popularmente coñecido como “verderón” e da locomotora que están instalados nas proximidades da estación. A portavoz municipal, Marta Lois, lamentou as declaracións realizadas recentemente polo alcalde, “que mostrou a súa absoluta falta de sensibilidade ao afirmar que eses elementos non pintan nada nas inmediacións da intermodal”.

A portavoz municipal de Compostela Aberta vén de realizar unha visita ao “verderón”, acompañada polo presidente da Asociación Compostelá de Amigos do Ferrocarril, Carlos Abellán. Marta Lois expresou o apoio de CA ao labor da asociación, e á recuperación do “verderón” e da locomotora ALCO 1808. Para a concelleira, “é incomprensible que Bugallo rexeite a permanencia destes elementos históricos na explanada da estación, en lugar de buscar solucións para o seu acondicionamento e conservación; e é aínda máis preocupante que cando se foron coñecemendo as reaccións de malesatr diante das súas palabras, non se autoemende senón que se ratifique demostrando a súa falta de sensibilidade”.

Marta Lois explicou que Compostela Aberta levará ao Pleno un rogo no que, ademais de pedir a rehabilitación da locomotora e do vagón, lle pide ao Goberno que inste ao ADIF e á Fundación dos Ferrocarrís Españois para que os dous elementos sexan catalogados e protexidos como BIC de Patrimonio Industrial Ferroviario.  O chamado “verderón”, data de primeiros do século XX, e foi rehabilitado en 1985, durante o primeiro goberno de Xerardo Estévez, grazas a un obradoiro de emprego. A locomotora, unha ALCO 1808 foi adquirida en 1958 por Renfe para poñer en marcha a liña Santiago-Ourense, e antes fora das primeiras en chegar a Galicia para trasladar mineral desde Ponferrada. Incorporouse ao conxunto da explanada da estación en 2006, sendo alcalde Bugallo.

PODES LER AQUÍ O ROGO DO GRUPO MUNICIPAL DE COMPOSTELA ABERTA PARA QUE O CONCELLO COLABORE NA RESTAURACIÓN E CONSERVACIÓN DA ANTIGA LOCOMOTORA E VAGÓN

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies