Compostela Aberta vén de pedirlle ao Goberno que explique os motivos polos que non reiniciou aínda as licitacións de dous proxectos vinculados á EDUSI que quedaron desertos en setembro, “e dos que nunca máis se soubo”. A portavoz municipal, Marta Lois, rexistrou unha pregunta para coñecer “cales son os motivos deste atraso, cando o propio alcalde se comprometeu en rolda de prensa a volver a convocar os dous procedementos en tan só unha semana, e xa van alá catro meses e medio”.
O grupo municipal de Compostela Aberta rexistrou hoxe unha pregunta para a súa resposta por escrito, para reclamarlle ao Goberno explicacións polo atraso no reinicio de dous procedementos de licitación vinculados á EDUSI: o de Prestación dos servizos de redacción do proxecto básico e de execución e dirección facultativa das obras do Centro Integral para a Inclusión Social, e o de Prestación do servizo de redacción de anteproxecto, proxecto básico e de execución e dirección facultativa das obras de recuperación do Campus Sur para o cidadán. A Xunta de Goberno declarou desertos os dous contratos o 20 de setembro e, recordou Marta Lois, “ese mesmo día o alcalde comprometeuse a reiniciar os procedementos en só unha semana, porque entendía que tan só era preciso darlle unha maior difusión para que as empresas se interesaran en asumir os traballos”. A portavoz de Compostela Aberta incidiu en que “desde esas palabras de Bugallo pasaron xa catro meses e medio, co agravante de que o alcalde afirmou en dúas ocasións en rolda de prensa que os procedementos estaban xa reiniciados, sen estalo”.
Na pregunta rexistrada hoxe, Compostela Aberta pídelle ao Goberno que aclare os motivos polos que non se reiniciaron os dous procedementos de licitación, se ten previsto introducir algunha modificación nos pregos, e se entende que houbo algún motivo para que ambos contratos quedaran desertos, alén da escasa difusión xa recoñecida publicamente polo alcalde. Por último, CA tamén reclama explicacións, despois de que Bugallo afirmara en outubro que os procedementos estaban reiniciados, cando seguen sen estalo a día de hoxe.
