- Xan Duro denuncia que o Goberno gastou máis de 65.000 euros, 50.000 para un mesmo adxudicatario, en estudos que tamén deben ser realizados ao abeiro do Plan de Mobilidade
- O concelleiro de CA cuestiona a utilidade de contratar un proxecto sobre rede de itinerarios sostibles na contorna da intermodal “cando xa están feitos os carrís bici de Clara Campoamor e do Hórreo, e proxectado o que se incluirá na humanización do Restollal”
O concelleiro de Compostela Aberta Xan Duro cuestionou hoxe o gasto que vén facendo o Goberno local en estudos relacionados coa mobilidade ciclista, que supera os 65.000 euros no que levamos de mandato. O edil pedirá explicacións no Pleno para coñecer “os resultados e a aplicación práctica destes informes, que se suman ao Plan de Mobilidade Urbana Sostible, que está xa adxudicado e no que tamén se deben recoller medidas pra mellorar a rede de itinerarios peonís e cicilistas”.
No que levamos de mandato, o Goberno municipal realizou varios contratos menores para a realización de diferentes estudos e informes sobre a mobilidade ciclista que superan os 65.000 euros. Tres deles, por un importe total de máis de 50.000 euros, foron para o mesmo adxudicatario, ao que se lle encargou en 2020 a redacción do “Estudo base para a definición do estado actual do uso da bicicleta en Santiago”; en 2021 a elaboración do documento técnico “Deseño de rede de itinerarios sostibles reducción pegada carbono”, e xa neste ano 2022 a elaboración do “Plan director da Bicicleta e VMP de Santiago de Compostela”. A maiores, no pasado mes de xuño contratouse a redacción do “Proxecto de execución da Rede de Itinerarios Sostibles-Fase I (entorno intermodal)”. Para Xan Duro, “este proxecto resúltando especialmente chamativo, tendo en conta que no contorno da intermodal existe un carril bici xa executado, e mal executado, no viario Clara Campoamor; outro tramo na rúa do Hórreo, e outro carril bici previsto no proxecto que vén de presentar o Goberno para a humanización do Restollal”. Por este motivo, sinalou, “sorprende que o Goberno encargue outro proxecto, ademais tendo en conta que hai outro documento aprobado para o deseño da rede de itinerarios sostibles reducción pegada de carbono”.
PMUS
Xan Duro explicou que a proliferación de contratos menores sobre mobilidade ciclista é aínda máis inexplicable, tendo en conta que está adxudicado o servizo de revisión do Plan de Mobilidade Urbana Sostible, financiado cos fondos europeos da EDUSI e orzado en case 140.000 euros. O concelleiro de Compostela Aberta lembrou que nos pregos para a licitación do PMUS xa se sinalaba que un dos obxectivos era “incorporar ao viario urbano a mobilidade ciclista e peonil, e mesmo se especifica que unha das cuestións a traballar é a análise do sistema de mobilidade en bicicleta, realizando un inventario da rede ciclista do municipio, analizando a utilización da bicicleta e deseñando unha folla de ruta para a progresiva captación de personas usuarias”. En concreto, os pregos do Plan de Mobilidade obrigan á adxudicataria a “integrar todas as propostas e medidas en materia de mobilidade ciclista nun documento específico denominado Plan Director de Mobilidade Ciclista e todo tipo de VMP, que se entregará como subproducto da asistencia técnica”. Para Xan Duro, o Goberno debe explicar “se os estudos xa contratados se solapan co Plan de Mobilidade, se o adxudicatario do PMUS terá que facer igualmente eses traballos que en boa parte xa lle foron encargados a outras empresas, e cal é o motivo concreto polo que se decidiu facer estas contratacións menores”.
PODES CONSULTAR AQUÍ A PREGUNTA ORAL DO GRUPO MUNICIPAL DE COMPOSTELA ABERTA SOBRE OS ESTUDOS SOBRE MOBILIDADE CICLISTA ENCARGADOS NO ACTUAL MANDATO
