Compostela Aberta denunciou hoxe “o estado calamitoso” no que se atopa o acceso peonil ao CEIP Apóstolo Santiago e ao Centro Xove da Almáciga, a través da rúa Proxecto Vagalume. A falta de mantemento deste espazo provocou que presente numerosas fochancas, que dificultan o paso do alumnado no colexio, sobre todo nos días de chuvia.
A concelleira María Rozas explicou que nas últimas semanas ven recibindo numerosas queixas, tanto da comunidade escolar do CEIP Apóstolo Santiago como das persoas usuarias do Centro Xove da Almáciga, polo mal estado no que se atopan os accesos peonís. Trátase do espazo lateral do colexio, desde a rúa proxecto Vagalume, que presenta enormes fochancas que provocan apozamentos nos días de chuvia. María Rozas explicou que “esta zona ten agora un maior uso por parte da comunidade educativa, porque cos protocolos Covid utilízase como entrada de parte do alumnado do CEIP Apóstolo Santiago”. María Rozas sinalou que “na actualidade este espazo non está incorporado á parcela do colexio, senón que se mantén aberto permanentemente como acceso ao Centro Xove da Almáciga, pero iso non foi acompañado dos traballos de mantemento acaídos”.
CA levará ao próximo Pleno un rogo para instar ao Concello a arranxar canto antes as deficiencias que presenta a zona, e para planificar o seu mantemento a longo prazo e evitar que volva presentar o estado actual.