Compostela Aberta pide que Santiago sexa declarado municipio de acollida de persoas refuxiadas afgás, particularmente de mulleres e nenas, e que se poñan a disposición do Goberno Central tantas prazas como sexan posibles para colaborar a reducir o impacto humanitario da situación que se vive en Afganistán desde a toma de Kabul polos talibáns. A portavoz municipal de CA, Marta Lois, incidiu en que “todas as administracións públicas, tamén a municipal, deben dar unha resposta solidaria e de defensa dos dereitos humanos, no caso de Santiago dando tamén cumprimento aos acordos adoptados no Pleno durante o pasado mandato”.
Compostela Aberta levará ao Pleno deste mes unha moción na que pide que a Corporación declare ao municipio de Santiago como lugar de acollida de refuxiadas, ademais de instar á Xunta de Galicia a mostrar tamén ao Goberno español a súa vontade de acoller a persoas procedentes de Afganistán “particularmente de mulleres e nenas que ven como os seus dereitos e as súas vidas están en perigo no seu país”. Do mesmo xeito, a moción presentada por CA tamén insta ao Goberno do Estado a habilitar un corredor humanitario para as persoas demandantes de asilo que queiran abandonar Afganistán e a tramitar esas peticións de asilo coa maior dilixencia.
Marta Lois lembrou que durante o pasado mandato, a corporación municipal aprobou unha Declaracion Institucional na que se sinalaba que “Santiago, conforme á súa especial filiación europea e vocación acolledora, debe colaborar de forma activa na solución de crises humanitarias” como a que naquel momento se viviu en Siria e agora lle afecta a Afganistán. A portavoz de Compostela Aberta insistiu en que “ningunha administración pública debe ser allea a unha situación como a que se vive en Afganistán, e todas elas, tamén a administración municipal, deben responder para defender os dereitos dos millóns de persoas afectadas, e en particular das mulleres e nenas que corren perigo inminente de seren lapidadas, torturadas, violadas ou asasinadas por cuestións tan simples como bailar, cantar, traballar ou estudar”. Ademais, a concelleira incidiu en que “non se pode esquecer a responsabilidade directa que teñen Estados Unidos, a OTAN, e a Unión Europea no terror que estar a vivir a poboación afgá, e por iso urxe unha maior reacción da comunidade internacional ante o desastre que supuxeron os últimos vinte anos de intervención e guerra en Afganistán”.
PODES LER AQUÍ A MOCIÓN DO GRUPO MUNICIPAL DE COMPOSTELA ABERTA PARA MANIFESTAR O APOIO ÁS PERSOAS REFUXIADAS AFGÁS, EN ESPECIAL MULLERES E NENAS QUE BUSCAN REFUXIO EN EUROPA