A concelleira de Compostela Aberta María Rozas pediulle hoxe ao Goberno que reforce a Oficina Municipal de Atención ao Contribuínte, “procurando fórmulas para que o servizo conte con persoal suficiente para atender as dúbidas da veciñanza durante o período de cobro do IBI”. A concelleira explicou que “a día de hoxe non se pode conseguir cita na oficina ata o 3 de setembro, o día laborable anterior a que remate o prazo para abonar o recibo, que este ano incorpora novidades que están a xerar dúbidas entre a veciñanza”.
María Rozas explicou que, por mor do cambio da aplicación informática, este ano tén mudado o formato do recibo do IBI, “e iso está a xerar dúbidas entre os e as contribuíntes, que se atopan con novidades como que o importe total a pagar figura agrupado, e non lles permite coñecer que cantidade corresponde a cada un dos bens inmobles da súa propiedade”. A maiores, a concelleira sinalou que “a Oficina de Atención ao Contribuínte estivo pechada unha semana por cuestións sanitarias, durante o prazo para o pago do IBI, e iso sen dúbida contribuiu á saturación do servizo”.
Ainda que o Concello tén contratado un servizo de atención telefónica para a atención ao contribuínte, Rozas apuntou que “é evidente que ese reforzo non abonda, porque en moitos casos os veciños e veciñas desexan ser atendidos presencialmente para resolver mellor as súas dúbidas”. Boa mostra é, indicou a concelleira de CA, “que a día de hoxe é imposible conseguir unha cita para a Oficina de Atención ao Contribuínte antes do venres 3 de setembro, e ese é xusto o día laborable anterior a que finalice o prazo para abonar o Imposto de Bens Inmobles”.
