Compostela Aberta levará ao Pleno do próximo luns as queixas da veciñanza de Vidán, que eva case un ano agardando pola instalación duns bolardos na zona de acceso peonil ao parque infantil da avenida Mestra Victoria Míguez. Tal e como lle explicaron os residentes á concelleira María Rozas, “desde a desaparición destes elementos, hai vehículos que acceden a esta zona restrinxida, creando situacións de risco para as nenas e nenos que se atopan na área de xogos”.
Compostela Aberta preguntará no Pleno polos motivos da tardanza na instalación dalgún elemento que evitara o acceso dos vehículos, á que se compretera o Goberno en agosto de 2020, despois de que a veciñanza de Vidán presentara un cento de firmas no rexistro do Concello. Os bolardos xa existían previamente e foron retirados, conservándose só as súas bases.
Pista de Fontecova
O grupo municipal de CA tamén levará ao Pleno un rogo para que o Concello acometa o arranxo da pista de acceso ao Monte Pedroso que vai de Brins a Fontecova. Trátase dun viario que é moi utilizado, tanto pola veciñanza como polos vixiantes do servizo de defensa contra os incendios forestais. A pista atópase nun estado deplorable, con fochancas e moitas pedras soltas que mesmo poñen en risco a seguridade. Compostela Aberta demándalle ao Goberno a súa reparación, de maneira urxente.
