- Xan Duro denuncia a presenza constante de vehículos mal estacionados en lugares non autorizados “nun ámbito de especial valor natural e patrimonial”
Compostela Aberta pídelle ao Goberno local que intensifique o control do estacionamento na contorna do parque de Belvís para frear a constante presenza de vehículos aparcados en lugares non autorizados. O concelleiro Xan Duro incidiu na obriga do Concello de “garantir a protección do patrimonio natural e patrimonial deste espazo especialmente sensible, que sofre moita presión de tráfico pola súa proximidade cos colexios de Virxe da Cerca”.
Xan Duro lembrou que co inicio do curso escolar intensifícase o tráfico rodado en toda a cidade, “e moi especialmente en todo o ámbito da Virxe da Cerca, onde se localizan varios centros educativos”. Este fluxo de vehículos aféctanlle ao parque de Belvís, “e son frecuentes as queixas pola presenza de coches mal aparcados, mesmo nos pasos de peóns e nas beirrarúas, especialmente na rúa que conecta as Trompas co Camiño da Ameixaga”, O concelleiro de Compostela Aberta incidiu en que o Concello mantén un convenio cos centros educativos desta zona, para que as familias poidan utilizar o aparcamento municipal xestionado por Tussa nas horas de entrada e saída do alumnado, “un acordo similar aos que existen con outros colexios, e que naceron co obxectivo de ordenar o tráfico, de evitar as aglomeracións, e de avanzar nunha cidade na que os coches non acaparen o espazo público no que as persoas deben ter o protagonismo”. Duro reclama que o Concello estea vixilante para evitar “o actual descontrol de vehículos mal estacionados, e se fora necesario revise os convenios cos colexios para garantir o seu correcto cumprimento”.
PODES CONSULTAR AQUÍ O ROGO DO GRUPO MUNICIPAL DE COMPOSTELA ABERTA PARA QUE O CONCELLO CONTROLE O ESTACIONAMENTO NAS ZONAS NON AUTORIZADAS NO PARQUE DE BELVÍS
