Compostela Aberta pónse a disposición do Goberno local para afrontar a situación xerada pola pandemia do coronavirus, e para colaborar en todas as medidas que sexan precisas para atender esta crise sanitaria. Nesa liña, o grupo municipal mostrou a súa disposición a facilitar a modificación de partidas orzamentaria se o Executivo o considerara preciso neste contexto.
Martiño Noriega mostrarálle ao alcalde, Xosé Sánchez Bugallo, o total respaldo de Compostela Aberta ás medidas que impulse o Goberno, na xunta de voceiros que está convocada para mañá venres. O portavoz de CA incidirá en que “diante desta nova situación, o Executivo pode agardar a actuación responsable do noso grupo municipal, que facilitará calquera decisión que implique modificacións orzamentarias, ben para adoptar medidas que contribúan a evitar a propagación do coronavirus, dentro das competencias municipais, ben para afrontar as consecuencias que se deriven da actual situación”.
