• O 2 de abril, o actual alcalde realizou unha vista ao Pombal na que sinalou como unha das súas prioridades revisar a seguridade do muro
  • Durante o pasado mandato, elaborouse un informe sobre o estado do talude e atendéronse todas as recomendacións dos técnicos municipais

Compostela Aberta vén de rexistrar unha pregunta para a súa resposta, por escrito, por parte do Goberno Local, en relación á caída do muro da Alameda que da á rúa do Pombal.  O grupo municipal quere saber se “pasados máis de cinco meses do inicio do mandato, o Goberno do PSOE realizou algún informe ou inspección sobre o talude, tal e como prometeu durante a campaña electoral o entón candidato Xosé Sánchez Bugallo”.

Na pregunta, Compostela Aberta explica que durante o pasado mandato realizouse un informe sobre o muro da Alameda, que concluía que os puntos de maior risco no talude correspondían a un tramo privado pertencente a diferentes persoas propietarias ás que se lle notificou para a limpeza e reparación. En canto ao tramo propiedade do Concello, o mesmo informe técnico recomendaba darlle traslado do expediente aos departamentos de Parques e Xardíns e ao de Proxectos e Obras para unha inspección, por se foran precisas máis labores que as de mantemento. Ambos departamentos concluíron que os riscos eran menores e só recomendaron manter a vixilancia sobre o talude. 

Promesa electoral de Bugallo

O grupo municipal tamén pón o acento en que o pasado 2 de abril, sendo aínda candidato á alcaldía polo PSdG, Xosé Sánchez Bugallo realizou unha visita ao Pombal na que estivo acompañado polos agora concelleiros Gonzalo Muíños e Javier Fernández. Nesa visita, o actual alcalde comprometeuse a avaliar o nivel de seguridade do muro da Alameda para actuar no caso de que houbera risco de desprendemento. Esas declaracións foron recollidas pola prensa da cidade, pero tamén pola conta oficial en Twitter do PSdeG de Santiago.

Época de fortes chuvias

A maiores, a comezos deste mes e despois da caída da pola dunha árbore na carballeira de San Lourenzo, o Goberno anunciaba a revisión do estado das árbores da carballeira de Santa Susana, á vista do mal tempo e das chuvias intensas. Naquel momento, o propio alcalde recoñecía que a chuvia fora a causante do suceso de San Lourenzo, porque a árbore estaba en perfectas condicións.

Tendo en conta que Santiago está a vivir o outono máis chuvioso dos últimos anos, con 26 xornadas de precipitacións seguidas e 42 desde outubro, Compostela Aberta pregúntalle ao Goberno se ten encargado algún informe ou inspección sobre o muro da Alameda, e se ten previstas outras medidas de mantemento ou inspección ante posibles situacións de risco. Tamén demanda información sobre as conclusións da revisión da Carballeira de Santa Susana anunciada a comezos de mes.

PODES CONSULTAR AQUÍ A PREGUNTA PRESENTADA POR COMPOSTELA ABERTA SOBRE O MURO DA ALAMEDA

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies