• A concelleira Branca Novoneyra pide que o Goberno colabore cos artistas de rúa no deseño da programación, e organice o acto de recoñecemento ao colectivo

O grupo municipal de Compostela Aberta pídelle ao Goberno local que deseñe unha programación especial para poñer en valor a arte de rúa durante a segunda quincena do mes de xullo, coincidindo coas festas do Apóstolo. Así se recolle nunha moción que a concelleira Branca Novoneyra defenderá no Pleno da próxima semana, na que propón a Alameda como escenario principal desas actuacións.

Branca Novoneyra lembrou que “a arte de rúa é parte da identidade de Santiago, e o colectivo de artistas precisa, despois da situación vivida nos últimos meses, retomar con forza a súa actividade”. Por iso, a concelleira insta ao Goberno a “colaborar cos propios artistas de rúa no deseño dunha programación que contemple espectáculos de circo, danza e outras artes, e que se poida desenvolver na segunda quincena de xullo, coincidindo coas festas do Apóstolo”. A edil de Compostela Aberta propón que esa programación se desenvolva na Alameda, “un escenario tradicional das festas, emprazamento das orquestras e das atraccións que, por mor da pandemia da Covid-19, non poderán desenvolverse nas condicións de anos anteriores”. Novoneyra tamén instou ao Goberno a organizar un acto de recoñecemento ao labor continuado dos colectivos de artistas de rúa, durante esta programación especial do Apóstolo.

A concelleira lembrou que, no pasado mes de febreiro, o Pleno aprobou unha moción conxunta de todos os grupos, en substitución dunha moción presentada por Compostela Aberta, para planificar estratéxicamente as artes de rúa no Xacobeo 2021. Branca Novoneyra expresou o seu desexo de que “o Goberno teña en conta a unanimidade mostrada pola Corporación en torno á necesidade de poñer en valor as artes de rúa, e sexa proactivo á hora de planificar unha programación específica para as festas”

PODES CONSULTAR AQUÍ A MOCIÓN DO GRUPO MUNICIPAL DE COMPOSTELA ABERTA PARA INICIAR O COMEZO DA PLANIFICACIÓN DAS ARTES DE RÚA DURANTE AS PRÓXIMAS FESTAS DO APÓSTOLO

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies