- Os tres grupos da oposición tamén urxen ao concelleiro de Mobilidade a render contas no Pleno sobre o estado da flota de autobuses
- María Rozas lémbralle a Bugallo que debe dar explicacións á Corporación e á veciñanza sobre o proceso de licitación, tal e como aprobou o Pleno a proposta de CA
Compostela Aberta, xunto con BNG e PP, solicita que a empresa municipal Tussa convoque un Consello de Administración extraordinario para avaliar a situación na que se atopan os autobuses urbanos, “despois dos incidentes rexistrados nas últimas semanas, o último deles hoxe mesmo co incendio sufrido por un vehículo en San Marcos”. A portavoz municipal de CA, María Rozas, reclamoulle ao Goberno “que adopte medidas con carácter urxente, porque o servizo de transporte atópase a día de hoxe unha situación de extrema gravidade que se debe resolver de inmediato, e que non pode agardar a un novo contrato que Bugallo non foi quen ainda de sacar a licitación”.
María Rozas incidiu en que “as frecuentes imaxes de autobuses avariados en distintos puntos de Santiago están creando unha alarma entre a veciñanza e son a mellor mostra de que non se está a prestar o servizo de transporte coa calidade que sería esperable”. Para a portavoz de Compostela Aberta, “o Goberno debe dar explicacións sobre cal é o estado real dos autobuses e, o máis importante, sobre cales son os seus plans para solventar a situación canto antes”. Nesa liña, a concelleira insistiu en que “os continuos incidentes demóstrannos que a flota actual non vai resistir ata que o Goberno teña resolto un novo contrato que ainda non saiu a licitación, transcorridos máis de tres anos e medio de mandato e a pesar das promesas do PSOE de que o procedemento estaría iniciado xa no ano 2019”.
Cumprir os acordos plenarios
A portavoz de CA reclamoulle tamén a Bugallo “que cumpra os acordos plenarios, e que dea contas da situación real na que se atopa a licitación do servizo de transporte urbano, máis alá das continuas escusas que pón para xustificar o atraso do procedemento”. María Rozas recordou que o Pleno da Corporación aprobou, na súa última sesión do 28 de outubro, unha proposición de Compostela Aberta que instaba ao Goberno a darlle explicacións aos grupos da Corporación e á veciñanza en xeral, a través da convocatoria do Pacto Local pola Mobilidade; a avaliar coa cidadanía o mapa de liñas e as frecuencias previstas no novo servizo, e a garantir nos pregos de licitación un proceso de concorrencia das diferentes empresas en igualdade de condicións, garantindo a subrogación e o mantemento de todos os traballadores que prestan o servizo, incluídos os da liña 6 que foron despedidos en decembro de 2020.
