Xan Duro visitou a estrada acompañado por Antonio Negreira e Alberto Lema

  • O grupo municipal de CA pide que a Deputación, en colaboración co Concello, defina as actuacións necesarias para mellorar esta vía

Compostela Aberta reclamou hoxe a mellora da seguridade viaria da estrada provincial DP-0701 e a reurbanización das rúas do ámbito do Avío, Torreira e O Romaño. O concelleiro Xan Duro visitou esta mañá a infraestrutura acompañado por Antonio Negreira, edil de Son do Val do Dubra, e Alberto Lema, deputado provincial da Marea Atlántica. Alí, Duro explicou que “máis de dous anos despois da entrada en funcionamento da Variante de Aradas, é preciso avaliar o seu impacto no viario que conecta Santiago e Val do Dubra e tamén afrontar a mellora dalgúns dos puntos máis conflictivos desta estrada provincial”. 

Compostela Aberta levará ao Pleno unha moción na que insta á Deputación da Coruña, titular do viario, a colaborar co Concello de Santiago para que se realice un estudo sobre a seguridade viaria e, posteriormente, orce as obras precisas na DP-0701. Xan Duro explicou que “xa hai necesidades evidentes, como a mellora da mobilidade segura de vehículos e veciñanza na contorna do lugar do Queiroal na Peregrina, ou nas proximidades da Ponte do Romaño”. O concelleiro de CA tamén se referiu a un punto negro na incorporación a Lamascal, “unha zona que ademais é moi utilizada polos ciclistas, o que pode incrementar as situacións de risco”.

Ademais, Xan Duro instou ao Goberno a estudar a posibilidade de habilitar un estacionamento de borde no Romaño, “que debería sumarse a unha mellora de frecuencias da liña P4 para facilitar que menos vehículos accedan á zona urbana”. Por último, o concelleiro de Compostela Aberta pediu que os próximos Plans de Travesías da Deputación da Coruña inclúa a reurbanización do ámbito do Avío-Torreira-Romaño, para darlle continuidade ás melloras urbanas realizadas hai máis de 10 anos xa no tramo de Galeras-Salvadas-Vista Alegre.

Son de Val do Dubra levará unha proposta similar á de Compostela Aberta ao Pleno do Concello de Val do Dubra, e Marea Atlántica fará o propio no Pleno da Deputación da Coruña.

PODES CONSULTAR AQUÍ A MOCIÓN DO GRUPO MUNICIPAL DE COMPOSTELA ABERTA PARA MELLORAR A SEGURIDADE VIARIA NA ESTRADA DP0701 DE SANTIGO ATA PORTOMOURO

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies