- O persoal do SAF denuncia que non se está a cumprir o convenio colectivo vixente nin se están respectando as condicións do prego da actual concesión
Compostela Aberta demándalle ao Goberno que elabore unha auditoría sobre a prestación do Servizo de Axuda no Fogar, que dea conta da súa calidade e do cumprimento do actual contrato. Anunciouno hoxe Marta Lois, que lamentou que as traballadoras do SAF “seguen sen ver atendidas as súas demandas e sen conseguir que se respecten os seus dereitos laborais, diante da pasividade do Goberno e da concelleira de Políticas Sociais”.
Compostela Aberta levará ao Pleno unha proposición na que reclama a elaboración desa auditoría detallada, con especial atención ao cumprimento do contrato nas cláusulas relativas á organización do servizo, os recursos humanos, os medios materiais, as axudas técnicas e servizos complementarios, e a calidade do servizo. Ese estudo deberá ser posto a disposición dos grupos municipais e da representación sindical das traballadoras do Servizo de Axuda no Fogar, que vén de manter unha xuntanza coa portavoz municipal de CA, Marta Lois, e coa concelleira María Rozas.
Descoordinación e incumprimentos
A portavoz de CA lembrou que en xuño cumprirase un ano da formalización do contrato do Servizo de Axuda no Fogar con Servisar, “e desde entón as traballadoras veñen denunciando reiteradamente os incumprimentos por parte da empresa”. Marta Lois explicou que, entre outras cuestións, ainda no se aplicou correctamente a suba do IPC para este ano, que debera ser do 6,5% segundo o convenio vixente, “e non a porcentaxe do 3,1% que foi aplicada, sen ter en conta ademais o complemento de antigüidade”. Tampouco se solucionaron os problemas para o aparcamento das traballadoras, “dúas cuestións polas que Compostela Aberta preguntou xa no Pleno de marzo e que a concelleira de Políticas Sociais asegurou que estaban en vías de ser arranxadas”.
As traballadoras do Servizo de Axuda no Fogar denunciaron tamén diferentes problemas na organización do traballo. Entre outras cuestións, non se contabilizan correctamente como horas de traballo as horas de formación ou as sindicais; non se chama para cubrir horas ás traballadoras con máis antigüidade que non teñen xornada completa tal e como establece o convenio colectivo; e as coordinacións que aparecen no novo contrato teñen en conta ás persoas usuarias pero non ás traballadoras, que aseguran non saber nin de cal dependen nin quen chamar para resolver incidencias. Ademais, non hai reunións periódicas coas coordinadoras, e as que se fixeron tiveron que ser en horas de lecer e non en horario laboral como correspondería.
Tarefas impropias
Outra das queixas que o persoal do SAF lle trasladou ao grupo municipal de Compostela Aberta tén que ver coas tarefas que se lles manda acometer. Segundo aseguran, están sendo obrigadas a realizar constantemente tarefas de limpeza de choque e de limpeza especial que corresponderían a empresas especiais de limpeza, e que van moito máis alá das funcións que teñen encomendadas na atención ás persoas usuarias. Marta Lois lamentou que “a concellería de Políticas Sociais estea asumindo con normalidade que as traballadoras do Servizo de Axuda no Fogar se encarguen destas tarefas, cando a súa función é a de ofrecer o apoio necesario para que as persoas usuarias poida manterse na súa contorna habitual, tanto no relativo ao coidado persoal como ás tarefas domésticas”. A portavoz de CA indicou que “as traballadoras están dedicando máis tempo a tarefas como limpeza de azulexos ou fiestras fronte á atención ás persoas”.
Marta Lois lembrou que “o Servizo de Axuda no Fogar é un servizo municipal, e polo tanto o Goberno local debe velar pola súa correcta prestación e atender tamén ás cuestións que lles afectan ás traballadoras”. A portavoz municipal de Compostela Aberta insistiu en que “o Goberno e a concelleira Mila Castro non poden estar permanentemente mirando para outro lado, coa escusa de que as relacións laborais son responsabilidade da empresa”.
