• María Rozas rexistrou unha solicitude de información “porque Bugallo leva un ano sen dar conta ao Pleno desa información, a pesar da esixencia legal para facelo”

Compostela Aberta reclamoulle hoxe ao Goberno “que cumpra a lei, e que facilite a información relativa á execución trimestral dos orzamentos de 2021 que nin está a levar ao Pleno nin está a remitir aos grupos da oposición”. A concelleira María Rozas lembrou que “dar conta no Pleno desa execución trimestral das contas é unha obriga das corporacións locais, que o Concello de Santiago está a incumprir desde hai xusto un ano, desde novembro de 2020”.

María Rozas vén de solicitar, a través do Rexistro, unha copia da información sobre a execución trimestral dos orzamentos de 2021, que o Concello de Santiago tivo que remitir ao Ministerio de Facenda. A concelleira de Compostela Aberta explicou que unha orde ministerial de 2012, que desenvolve a Lei de Estabilidade Orzamentaria, establece cales son as obrigas de subministro de información das administracións públicas “en virtude do principio de transparencia que debe rexir o seu funcionamento, para garantir o control da xestión pública e facilitar a rendición de contas”. Rozas lamentou que “o Goberno de Bugallo está obviando estas obrigas, nomeadamente no que tén que ver coa presentación dun resumo do estado de execución do orzamento a finais de cada trimestre”. Tal e como se contempla nesa orde ministerial, as Corporacións locais deben remitir esa información ao Ministerio de Facenda antes do último día do mes seguinte ao da finalización de cada trimestre, e posteriormente dar conta do informe no seguinte Pleno ordinario. No caso de Santiago, denunciou a concelleira, “non se deu conta da execución trimestral dos orzamentos desde o Pleno de novembro de 2020, hai xusto un ano, polo que lle esiximos ao Goberno que nos remita a información relativa aos tres primeiros trimestres deste ano 2021”.

María Rozas sinalou que “son moitas as mostras que dá este Goberno da súa nula vontade de practicar a transparencia na súa xestión, e boa proba é a non actualización de numerosos datos na páxina web municipal”. Así, denunciou que o Concello leva sen publicar os datos do Periodo Medio de Pago a Proveedores desde o pasado mes de marzo, “probablemente porque tén pouco interese en transparentar que no que levamos de ano non foi quen de cumprir nin unha soa vez os prazos fixados por lei, algo que só conseguiu en cinco meses dos máis de dous anos que levamos de mandato”.

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies