Compostela Aberta recuperará e impulsará a participación da veciñanza na vida municipal, “porque cremos na democracia participativa e defendemos que os veciños e veciñas deben implicarse na toma de decisións máis alá das eleccións”. Explicouno hoxe María Rozas, que lamentou “o enorme retroceso que vivimos nestes catro anos en materia de diálogo, participación e transparencia”. A candidata de CA á alcaldía comprometeuse a fortalecer ferramentas como os Orzamentos Partipativos ou os encontros Ao Vivo, “que impulsamos no pasado mandato e que demostraron que hai outra maneira de gobernar, da man da xente e non de costas a ela”.
María Rozas compartiu hoxe un almorzo informativo con parte da candidatura de Compostela Aberta para as próximas eleccións. A candidata explicou que “a nosa lista bebe do movemento asociativo, moitos dos homes e mulleres que me acompañan foron e son activistas en diferentes eidos, e por iso sabemos que a cidadanía quere participar das decisións que lle afectan”. Iso tamén quedou en evidencia, sinalou Rozas, durante o pasado mandato, “coa boa acollida que tiveron iniciativas novidosas como os Orzamentos Participativos”.
Mellorar os Orzamentos Participativos
A candidata de Compostela Aberta comprometeuse a recuperar e mellorar os Orzamentos Participativos, “aos que no pasado mandato chegamos a destinar un orzamento de 1,5 millóns de euros, e para os que recibiamos cada ano en torno a 300 propostas dos veciños e veciñas”. María Rozas explicou que “os orzamentos son a principal ferramenta que teñen os Concellos para definir políticas públicas, e nós temos o convencemento de que a veciñanza debe ter capacidade de decisión sobre as contas e contribuir a fixar as prioridades no gasto”. A cabeza de lista de CA lembrou que “ainda que en Santiago Bugallo non quixo darlle continuidade a este novo modelo, non aconteceu o mesmo noutras cidades gobernadas polo PSOE como A Coruña; ou mesmo polo PP, como Madrid”. Para Rozas, “a súa negativa a poñer en marcha o proceso dos orzamentos participativos, ainda téndose comprometido por escrito nun acordo con Compostela Aberta para a aprobación dos orzamentos municipais, responde a dúas cuestións: que Bugallo era consciente da incapacidade do seu Goberno para xestionar mesmo o ordinario, e que ao candidato socialista non lle interesa a opinión da veciñanza”. Nese sentido, lembrou que “o Goberno socialista mantivo esquecidos os proxectos que xa foran seleccionados e aprobados nos orzamentos participativos durante o noso mandato, en procesos nos que votaron máis de 4.500 persoas”. É o exemplo, explicou, “dos parques infantís cubertos, que non quixo executar máis alá do de Santa Marta”. A aspirante de CA á alcaldía comprometeuse a ampliar a dotación dos Orzamentos Participativos, “e tamén as áreas municipais nas que se poderán presentar propostas, para integrar as de Igualdade e Cultura, entre outras”.
Gobernar escoitando
María Rozas tamén se comprometeu a “activar de verdade, e non só para a foto e no tempo de desconto do mandato, os Consellos Municipais de Participación, para que sexan órganos útiles para a veciñanza e non sigan baleiros de contido”. Iso, explicou, “fíxose no pasado mandato, convocando os Consellos Municipais para afrontar cuestións como a preparación de pregos para diferentes contratos públicos”. A candidata de CA insistiu en que “a práctica nestes últimos catro anos foi oposta, e de feito o Goberno de Bugallo nin sequera cumpriu a obriga de convocar a Comisión de Seguemento da EDUSI, que debería reunirse de maneira semestral e só se reuniu nunha ocasión en todo o mandato”.
Fronte a iso, María Rozas avanzou a vontade de Compostela Aberta de recuperar os encontros Ao Vivo, que o Goberno de CA celebrou no pasado mandato polos barrios e parroquias para render contas diante da veciñanza e para recoller as súas reclamacións e demandas. Estes encontros, explicou, “permitían coñecer de primeira man as peticións dos veciños e veciñas e explicar en que situación se atopaban os proxectos de interese en cada barrio”. A candidata de Compostela Aberta reiterou que “hai unha queixa común que vimos recollendo nos últimos meses, que tén que ver coa falta de diálogo, coa falta de escoita por parte do alcalde Bugallo, é evidente que houbo un enorme retroceso nesta materia, e CA volverá demostrar que hai outra maneira de gobernar, da man da veciñanza”
No almorzo informativo celebrado esta mañá participaron, ademais de María Rozas, as persoas que ocupan o primeiro tramo da candidatura de Compostela Aberta: Xan Duro, Comba Campoi, Miguel Penas, Graciela Carro, Javier García, Marisa Álvarez Garea, Jaime Bello, e Luisa Pasín. Non puido asistir a número 10 da candidatura, Marta Lois.
