• CA  reclama que estas entidades sexan convidadas a participar tamén nas mesas sectoriais de traballo creadas para avaliar a situación derivada da Covid-19

O grupo municipal de Compostela Aberta vén de rexistrar unha solicitude para que a composición do Consello Económico e Social de Compostela sexa ampliada aos colectivos que traballan no eido da economía social e solidaria. Ao tempo, reclama que estas entidades formen parte das mesas sectoriais de traballo que foron creadas tras a primeira reunión do CES, para avaliar a situación derivada da pandemia da Covid-19.

A concelleira Marta Lois explicou que “a composición do Consello Económico e Social é insuficiente, e debe ser ampliada para ter en conta a experiencia e o rol da economía social e solidaria”. Nese sentido, lembrou que “este sector representa precisamente unha das aprendizaxes que deberamos extraer da crise derivada da Covid-19: que a economía tén que estar ao servizo das persoas, e que as persoas teñen que estar por riba do capital”. Por iso, a concelleira pediulle ao alcalde que incorpore ás mesas de traballo creadas tras a primeira reunión do Consello Económico e Social a “entidades que levan moito tempo traballando e que actúan orientadas polos valores da equidade, a solidaridade, a sostenibilidade, a inclusión e o compromiso da comunidade”.

Compostela Aberta entende que as entidades de economía social de Santiago deben ser escoitadas nas mesas de traballo, creadas para reflexionar sobre as temáticas da cohesión territorial, a cohesión social, a cohesión económica e a formación e transición profesional. A súa incorporación debera producirse antes de iniciar, nos próximos días, os traballos destes grupos.

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies