Compostela Aberta vén de rexistrar unha solicitude de información en relación ao espectáculo dos Fogos do Apóstolo, tras a cancelación dos lanzamentos desde dous dos oito puntos previstos, e o incendio orixinado nas inmediacións do Parque Eugenio Granell do Restollal. O grupo municipal de CA quere coñecer toda a información sobre ese lume, e sobre os cambios derivados da eliminación de parte da pirotecnia contratada polo Concello.
Na solicitude rexistrada hoxe, Compostela Aberta pide que lle sexa facilitada unha copia ou ter acceso ao expediente completo de tramitación dos Fogos do 24 de xullo, así como dos informes relativos ás localizacións do dispositivo de emerxencia durante o espectáculo. Tamén se require unha copia das comunicacións que se produciron entre o Concello de Santiago e a Consellería do Medio Rural ao respecto dos puntos de lanzamento, e que segundo apuntou o alcalde derivaron na recomendación, por parte do departamento autonómico, no propio 24 de xullo, ás 14.45 horas, de que se suprimiran os disparos de pirotecnia nas zonas da Granxa do Xesto e o Monte de Deus. A ese respecto, Compostela Aberta quere coñecer as comunicacións que se produciron entre o Concello e a empresa adxudicataria dos Fogos e as modificacións realizadas, tanto técnicas como económicas, tras a anulación dos lanzamentos desde dous dos oito lugares inicialmente previstos.
Tendo en conta que os Fogos provocaron un incendio nas inmediacións dun dos puntos de lanzamento, Compostela Aberta solicita acceder aos informes realizados polo Concello sobre ese lume no Restollal, así como sobre outros posibles danos acontecidos na noite do 24 de xullo; así como aos partes internos de Policia Local, Bombeiros e Protección Civil nesa noite.
Por último, o grupo municipal de CA require información ao respecto das comunicacións públicas do Concello de Santiago para informar tanto do incendio como doutros percances que se puideran producir polos Fogos do Apóstolo, fora a través da súa páxina web ou das súas redes sociais.
PODES CONSULTAR AQUÍ A SOLICITUDE DE INFORMACIÓN REXISTRADA POR CA
