Compostela Aberta levará ao Pleno desta semana unha moción para reclamarlle á Xunta que recupere o servizo de Pediatría no Centro de Saúde de Conxo, que fica suspendido desde o pasado 26 de marzo. A concelleira María Rozas lembrou que este servizo vén sendo desmantelado de maneira paulatina nos últimos anos, “primeiro sen cubrir as ausencias da persoa titular, e máis recentemente limitando a atención presencial a só dous días á semana, antes da supresión definitiva”. Na moción, o grupo municipal de CA tamén lembra a débeda que tén pendente o Goberno galego coa construción do novo Centro de Saúde de Conxo.
María Rozas explicou que, tal e como denunciou a Asociación de Pacientes e Usuarios do CHUS, o servizo de Pediatría no Centro de Saúde de Conxo foi suspendido o pasado 26 de marzo, e xa desde xaneiro o SERGAS decidiu reducir a atención presencial para a poboación infantil de 0 a 14 anos a só dous días á semana, os martes e os xoves. Para a concelleira, “esta decisión é difíclmente xustificable, tendo en conta que Conxo é unha das zonas de Compostela que máis vén medrando en poboación nos últimos anos, e polo tanto conta cun elevado número de nenos e nenas que teñen dereito e precisan recibir atención no seu centro de saúde de referencia”. Rozas sinalou que non é a primeira vez que a veciñanza de Conxo sofre as consecuencias da mala planificación e dos recortes do SERGAS. De feito, xa en 2018 producíronse demoras de máis dun mes na atención aos nenos e nenas porque non se cubriu a ausencia da pediatra do centro de saúde. A edila lembrou “a importancia da atención nos prazos establecidos á poboación infantil, sobre todo aos bebés, para os que é fundamental a atención temperá para detectar determinados problemas de saúde”.
A concelleira de Compostela Aberta aproveitou para lembrar que “a veciñanza de Conxo leva anos agardando por un novo centro de saúde, comprometido pola Xunta en 2008, e que segue sen figurar nos orzamentos autonómicos”. Na moción, María Rozas tamén insta ao Goberno galego a “cumprir o seu compromiso, incorporando nas contas de 2022 unha partida específica dun mínimo de dous millóns de euros para a construción do novo centro”.
PODES CONSULTAR AQUÍ A MOCIÓN DO GRUPO MUNICIPAL DE COMPOSTELA ABERTA PARA A RECUPERACIÓN DO SERVIZO DE PEDIATRÍA NO CENTRO DE SAÚDE DE CONXO
