- O persoal dos CSCs concentrouse esta mañá diante do Pazo de Raxoi
Compostela Aberta urxe ao Goberno local a explicar como vai garantir que se manteñan as condicións laborais do persoal dos Centros Socioculturais cos novos contratos para a súa xestión. A concelleira Branca Novoneyra lembra que “desde CA advertimos que os pregos para esa licitación, dividida en catro lotes, contiñan numerosas anomalías e deficiencias pero o equipo de Bugallo decidiu non escoitar, e iso está a poñer en risco a situación dos traballadores e traballadoras”. Por iso, o persoal dos CSCs concentrouse esta mesma mañá ás portas do Pazo de Raxoi, en defensa dos seus dereitos laborais.
Compostela Aberta pediu xa en decembro de 2021 a retirada dos pregos para a licitación da xestión dos Centros Socioculturais, tras comprobar que contiñan numerosos erros, imprecisións e incoherencias entre os catro lotes nos que foi dividido o servizo: animación sociocultural, bibliotecas, atención ao público, e novas tecnoloxías. Entre esas deficiencias destacaban cuestións fácilmente detectables, como o feito de que os horarios de abertura dos centros non cadraban coas horas de servizo de animación sociocultural ou da abertura das bibliotecas; non se prevé a abertura regular de ningún centro os sábados pola tarde; os eros nos cadros das horas de animación, ou mesmo dos meses nos que terían que funcionar as aulas de novas tecnoloxías.
Precarización laboral
Tal e como explica Branca Novoneyra, “en decembro tamén advertimos que os pregos podían derivar na precarización do persoal e o incumprimento das súas condicións actuais”. Así, a concelleira de Compostela Aberta sinalou que os pregos prevén a contratación de 14 persoas para a abertura dos centros e a atención ao público, “pero tendo en conta o calendario previsto e as horas de servizo, estas persoas estarían contratadas tan só a media xornada”. Do mesmo xeito, o Goberno contemplou un orzamento de pouco máis de 11 euros/hora para a realización de actividades extraordinarias de animación sociocultural, “un prezo que dificultará facer unha contratación de calidade e de persoal especializado para este tipo de tarefas”. Ademais, existen outras dúbidas con respecto ao traballo que terá que facer o persoal,. “porque non se aclara quen terá que facer determinadas funcións como a xestión de redes, a xestión da web ou das apps”.
A concelleira de Compostela Aberta insistiu en que “tamén en decembro advertimos das dúbidas que deixaban os pregos en relación á subrogación do persoal dos centros socioculturais, dúbidas que son as mesmas que agora manifestan os traballadores e traballadoras, e que se agravan polo feito de que un dos catro lotes do contrato, o de novas tecnoloxías, xa quedou deserto”.
Escaso interese na licitación
Para Branca Novoneyra, “é evidente que os pregos non estaban ben feitos, tal e como alertamos desde Compostela Aberta, porque un dos lotes xa quedou deserto, e no caso dos outros tres non houbo o interese que cabería esperar das empresas”. Para a concelleira, “o feito de que só unha empresa presentara unha oferta para o lote de atención ao público, que tén un orzamento de case 450.000 euros, e que só tres empresas se interesaran nos lotes de animación sociocultural e bibliotecas”.
Así as cousas, Compostela Aberta preguntará no próximo Pleno polas medidas que vai tomar o Goberno municipal para garantir a subrogación dos traballadores e traballadoras do lote que quedou deserto na licitación, así como o mantemento das condicións laborais do convenio colectivo polo que se rexe na actualidade o persoal deste servizo público municipal.
