Nos últimos anos Santiago converteuse en capital da loita contra as violencias machistas con campañas como “En Negro”.

Unha campaña que a xente fixo súa, chegando xa a máis de 100 concellos e 3000 comercios e centros escolares.

De “Compostela en Negro” pasamos a “Galicia en Negro”, nunha rede crecente de fraternidade e cooperación contra o machismo que se espalla xa por todo o país.

Neste mandato tamén vimos nacer por fin a Casa das Mulleres Xohana Torres, un ansiado proxecto prometido durante anos que hoxe xa é un espazo central dunha cidade con nome de muller.
Porque aí están o Estadio Verónica Boquete en San Lázaro, o parque Begoña Caamaño, a ludoteca María Miramontes en Fontiñas ou o o aeroporto Rosalía de Castro en Lavacolla.

Sentimos orgullo desta Compostela que se corresponsabiliza nos coidados, que aposta pola educación non sexista e que reivindica a memoria das que fomos e das que somos nos obradoiros de empoderamento no rural.

Sentimos orgullo desta Compostela que inunda as súas prazas de dignidade e rebeldía feminista, que berra alto e claro que non dará un paso atrás ante o machismo e a intolerancia.

Fixemos moito, pero queda moito por facer para que todos os días sexan 8 de marzo.

Por iso seguiremos día a día gañando máis futuro para un Concello que é Territorio feminista.

 

 

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies