Durante a tarde de onte, foron distribuídos diferentes vídeos nos que se pode observar unha actuación policial excesiva e desproporcionada por parte dos axentes da UIP da Policia Nacional despregados durante a manifestación.
Diante de situacións coma esa non podemos deixar de denunciar a extralimitación de varios axentes no exercicio das súas funcións. A policía debe ter como obxectivo garantir a seguridade das persoas, e por iso non poden admitirse actuacións coma as vividas onte. A pesar das condicións meteorolóxicas, a manifestación convocada pola “Coordenadora Galega de Solidariedade coa Palestina” foi todo un éxito, e non se pode admitir que o seu resultado fique ensombrecido por episodios como os acontecidos.
Compostela Aberta é unha organización pacifista e, desde as nosas orixes, mostramos sempre a nosa solidariedade co pobo palestino e aínda máis en momentos como o actual no que a agresión de Israel é totalmente insoportable. Onte era o día de denunciar os crimes de guerra, o xenocidio e o asasinato sistemático en Gaza, e en toda Palestina, de millares de persoas, entre elas millares de crianzas.
Esperamos que se investigue o acontecido porque só dese xeito se pode defender a función e credibilidade das institucións. Neste sentido, solicitamos que se aclare, canto antes, a secuencia dos feitos e que explique esta actuación policial. Son os propios poderes públicos os que deberían ser os primeiros interesados en render contas e tomar medidas diante de calquer exceso.
Desexamos que non volvamos presenciar este tipo de episodios en Santiago de Compostela.
