- Á veciñanza de Compostela gústalle que Santiago sexa: capital, galega, picheleira, alegre, dinámica, acolledora, sustentábel e participativa.
- Fronte ao dinamismo social, o Concello aparece sistematicamente como un empezo, como un impedimento, como un estorbo.
- A nosa sempre foi unha cidade acolledora, punto de encontro e lugar que moitas e moitos composteláns escolleron como a súa cidade para viviren.
- A Compostela que queremos tamén ten que exercer como grande capital de Galiza, ten que voltar ser cidade referente, motor dunha grande área metropolitana
A candidatura de unidade popular Compostela Aberta desenvolverá esta semana unha campaña centrada na necesidade de a cidadanía se mover para conseguir o Santiago que nos gusta, a través dunha imaxe que salienta as características da Compostela que desexamos, da Compostela construída desde o tecido asociativo e a sociedade civil. Á veciñanza de Compostela gústalle que Santiago sexa: capital, galega, picheleira, alegre, dinámica, acolledora, sustentábel e participativa. É por iso que o tema central da campaña fica resumido no apelo colectivo: “Movámonos polo Santiago que queremos”.
Compostela é unha cidade de enorme vitalidade, na que as iniciativas e propostas que parten da sociedade son constantes. Fronte a este dinamismo, temos un Concello e un goberno que actúa sistematicamente como un estorbo. Ás veces por non exercer como dinamizador e outras, mesmo, por colocar todos os impedimentos e obstáculos legais. Un goberno local que non sabe xestionar, que só procura o titular fácil, que non atende as necesidades e demandas veciñais. Posuímos variados exemplos disto: a problemática da música ao vivo na cidade vella, a parálise de todo o barrio de Conxo por causa das obras, a falta de manutención das dotacións en case todos os barrios, o abandono do rural e das infraestruturas xa construídas -como a rede de CSC- que apodrecen…, apenas son algúns dos exemplos.
Punto de encontro e grande capital galega.
A nosa sempre foi unha cidade acolledora, punto de encontro e lugar que moitas e moitos composteláns escolleron como a súa cidade para viviren. Un Santiago alegre, orgulloso dos seus barrios e parroquias, orgulloso de todo o que é tecido en cada recuncho do municipio. Plural e fillo dunha mestizaxe que nos ten situado como unha das áreas máis dinámicas de todo o país.
A Compostela que queremos ten tamén que exercer como grande capital de Galiza, ten que voltar a ser cidade referente, motor dunha grande área metropolitana na que temos que construír novos mecanismos para adecuarmos a administración local á realidade. Santiago, Ames e Teo teñen que camiñar xuntamente. A nosa área metropolitana é a terceira do país e un eixo central para articular o territorio galego.
A partir do 24 de maio temos unha grande oportunidade para conseguirmos este Santiago que queremos, entre todas e todos, é por iso que Compostela Aberta lanza este apelo a movérmonos e construírmos colectivamente a alternativa.
