- Duarte pregúntase “que foi da gran ofensiva anunciada por Bugallo para mellorar o proxecto que tanto criticaba no pasado mandato, e que hoxe vimos que mantén as súas características esenciais”
“A presentación do proxecto da nova estación de ferrocarril demostrou hoxe que Santiago terá unha gran intermodal grazas ao convenio asinado durante o pasado mandato polo alcalde Martiño Noriega, e que o Goberno de Compostela Aberta foi quen de desbloquear unha infraestrutura pola que a capital galega levaba máis dunha década agardando”. Así se pronunciou hoxe o concelleiro Jorge Duarte, despois de asistir ao acto celebrado no Pazo de Raxoi para coñecer o deseño do arquitecto Juan Herreros. Duarte lembrou que “foi en agosto de 2017 cando ADIF decidiu licitar de forma conxunta os proxectos das dúas fases da intermodal, a primeira delas xa finalizada e posta en funcionamento e a segunda a que hoxe coñecemos”.
O concelleiro de Compostela Aberta Jorge Duarte mostrou a súa satisfacción porque “Santiago vai ter a intermodal que precisa, a pesar dos malos agoiros dos que nin sequera quixeron asistir ao acto no que o alcalde Martiño Noriega, a conselleira Ethel Vázquez e a ministra Ana Pastor asinaron o convenio que posibilitou que hoxe esteamos coñecendo a estación do futuro”. Para o edil, “confírmase hoxe todo o que CA asegurou ao longo do pasado mandato: que teriamos nova estación do ferrocarril e que non habería que agardar aos 3,5 millóns de pasaxeiros para a construción da segunda fase da intermodal”. Nese sentido, Duarte lembrou que “nin sequera foi preciso modificar o convenio asinado no seu día, como sostiña Bugallo”.
Jorge Duarte salientou que o proxecto presentado hoxe, e do que se iniciou a licitación en 2017, “non muda na súa esencia con respecto aos primeiros borradores que xa coñecimos durante o pasado mandato, e que foran duramente criticados polo hoxe alcalde”. Nese sentido, o concelleiro de CA preguntouse “que foi da gran ofensiva para mellorar o proxecto da intermodal que anunciara un Bugallo, que era especialmente crítico co relativo á área de aparcamento da intermodal que, tal e como vimos hoxe, manténse no previsto inicialmente”.
