Compostela Aberta instará ao Goberno, no Pleno da próxima semana, a impulsar a creación dunha nova zona deportiva na contorna das Brañas de Sar, na parcela xa destinada a ese fin no PXOM vixente. Jorge Duarte explicou que no anterior mandato fora encargada a redacción dun anteproxecto para facer realidade este novo equipamento, que completaría o coñecido como Campo de fútbol da Colexiata, e do que nada se soubo nestes meses de mandato.
O concelleiro Jorge Duarte explicou que o Plan Especial de Ordenación, Protección, Mellora Medioambiental e Acondicionamento das Brañas do Sar, aprobado en 2011, inclúe unha parcela destinada a zona deportiva, dalgo máis de 40.000 metros cadrados. Trátase do solo que xa está ocupado, na súa zona central, polo campo de fútbol de terra coñecido como Campo da Colexiata. O concelleiro explicou que “esta plataforma supón un impacto nas Brañas, interrompe a circulación, e por iso o Plan Especial pretende mudar esta instalación para que quede máis integrada topográfica e paisaxísticamente, e mesmo para abrir un novo viario de conexión entre o rueiro de Muíño e a rúa de Brañas de Sar”. Tamén se contemplaba o acondicionamento dunha zona de aparcamento, “que lle daría servizo ás persoas usuarias do equipamento deportivo e tamén á veciñanza do barrio”. O edil de CA sinalou, ademais, que “é importante dotar esta zona de pistas polideportivas, porque hai unha clara carencia en Compostela deste tipo de equipamentos multiúsos”.
Rematar os traballos iniciados
Duarte explicou que “todas estas premisas estaban recollidas nun anteproxecto de planeamento que foi presentado a finais do pasado mandato, e que fora encargado polo anterior Goberno atendendo a unha demanda da veciñanza do barrio”. Para o concelleiro, “pechar este planeamento é un primeiro paso moi importante para seguir mellorando as Brañas de Sar”.
Jorge Duarte lembrou que no anterior mandato, a concellería de Espazos Cidadáns iniciou catro proxectos de novo planeamento, tres deles vinculados coa mellora da accesibilidade, e un cuarto relacionado con esta zona deportiva de Brañas de Sar. En canto aos tres proxectos relacionados coa accesibilidade, só foi aprobado o que regulaba a instalación de ascensores en San Ignacio de Loyola e tampouco houbo avances nos proxectos relativos á rúa do Penedo; e á rúa Oviedo e á avenida de Salamanca.
PODES CONSULTAR AQUÍ A PROPOSICIÓN DE COMPOSTELA ABERTA PARA IMPULSAR UN COMPLEXO DEPORTIVO AO AIRE LIBRE NO BARRIO DE SAR