• A concelleira de Compostela Aberta denuncia que os informes da Conta Xeral de 2020 evidencian “a mala xestión dos autoproclamados bos xestores”

 María Rozas denunciou hoxe que os informes da Conta Xeral de 2020 “poñen unha vez máis en evidencia a gran falacia de Bugallo e do seu goberno como o dos grandes xestores, e demostran que o PSOE fai cando goberna o contrario do que predica cando é oposición”. A concelleira de Compostela Aberta referiuse, en concreto, á memoria sobre os procedementos de adxudicación dos contratos municipais, que recolle que o ano pasado “o Goberno local gastou case oito millóns de euros en contratos menores, os de adxudicación directa, o dobre do que gastou o Goberno de CA en 2018 e que, naquela altura, aos socialistas lles resultaba escandaloso”.

A memoria sobre os procedementos de adxudicación dos contratos municipais incluída na Conta Xeral de 2020 recolle que o ano pasado o Concello de Santiago realizou contratos por valor de 24,9 millóns de euros. Desa cifra, 7.919.857 euros foron adxudicacións directas, o que equivale a case o 33% do total. María Rozas lembrou que, tal e como se recolle na Conta Xeral de 2018, “no último exercicio completo no que gobernou Compostela Aberta as adxudicacións directas foron de 4,1 millóns de euros, o 18,4 % do total de contratos de 2018”.

Para María Rozas, eses datos “evidencian en primeiro lugar que non existiu un abuso dos contratos menores por parte do Goberno de Compostela Aberta, tal e como durante o pasado mandato quixo facer ver a oposición, tamén o PSOE, con cifras que quedaron na metade do que está a gastar o executivo socialista en adxudicacións directas”. Ademais, a concelleira lembrou que “o propio Bugallo asegurou durante a campaña electoral que os gastos en contratos menores por parte de CA evidenciaban incapacidade de xestión, polo que o alcalde debe agora explicar por que non reduciu esas adxudicacións directas senón que as duplicou ao longo do ano pasado”. Rozas advertiu que “o PSOE non pode escudarse tamén na Covid para xustificar estes datos, porque os contratos menores relacionados coa crise do coronavirus non explican o incremento do gasto tal e como se pode comprobar nas relacións publicadas na páxina web municipal”. A concelleira apuntou, ademais, que “nos dous primeiros trimestres de 2021 o Goberno de Bugallo xa leva gastados máis de dous millóns de euros en contratos menores, mentres segue sen darlle cumprimento ao Plan de Contratación aprobado hai máis dun ano e mentres segue levantando reparos para pagar facturas de servizos prestados sen contrato”.

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies