- Rozas lamenta “a involución que supuxo o regreso de Bugallo á alcaldía en termos de participación”
A concelleira de Compostela Aberta María Rozas acusou hoxe ao Goberno local de “menosprezar á veciñanza de Santiago, ao non executar boa parte dos proxectos que foron seleccionados nos procesos de Orzamentos Participativos do pasado mandato, aínda dispoñendo dos fondos necesarios para facelos realidade”. Para a edil, “é moi significativo que Bugallo decida gardar nun caixón actuacións que foron propostas pola cidadanía, avaliadas polos técnicos municipais e votadas por case 5.000 persoas, deixando sen utilizar as partidas que tiñan consignadas”.
María Rozas explicou que, transcorridos máis de dous anos do actual mandato, o Goberno local “segue tendo unha débeda coa veciñanza que se involucrou dun ou doutro xeito nos Orzamentos Participativos, que foron un proceso reglado e garantista no que participaron milleiros de persoas e que comprometía, non ao Goberno de Compostela Aberta, senón á institución municipal”. Para a concelleira, “é lamentable que Bugallo e o seu equipo actúen como se os OPs non tiveran existido, e só se executaran algunhas actuacións que foron incluídas no acordo para a aprobación dos orzamentos municipais de 2020, asinado por PSOE e CA”. Tal e como explicou, “continúan esquecidos moitos proxectos que conseguiran o apoio da veciñanza, que contaban xa cunha partida orzamentaria asignada, e en moitos casos mesmo con proxectos redactados e pregos feitos para a súa contratación”.
Proxectos de gran demanda social
Rozas incidiu en que os proxectos obviados polo Goberno do PSOE “non só foron respaldados pola veciñanza no seu momento, senón que a día de hoxe, e despois da situación de pandemia que vivimos, semellan aínda máis acaídos para atender as novas demandas da cidadanía en canto ao uso dos espazos”. Así, lamentou que o equipo de Bugallo abandonara actuacións como o acondicionamento dos parques infantís cubertos de Castiñeiriño e das Fontiñas, para o que se reservara unha partida de 200.000 euros, ou a construción dun espazo de ocio cuberto en Laraño. Con respecto a este proxecto, María Rozas explicou que “a asociación de veciños vén de trasladarnos que o Goberno xa lles comunicou que desistía de executar ese proxecto, aínda tendo os cartos para facelo”.
Na mesma liña, Rozas explicou que nada se sabe de actuacións como o acondicionamento do carril bicil a praia fluvial de Chaián, para o que estaban consignados 370.000 euros; ou para a senda peonil e ciclable Lagoa de Cornes-Porto de Conxo, orzada con case 200.000 euros. Ambos itinerarios, sinalou a concelleira, “permitirían poñer en valor espazos naturais de Compostela, descentralizar o turismo e mesmo apostar por unha mobilidade máis sustentable, cuestións que parecen importarlle pouco ao Goberno de Bugallo”. Entre os proxectos dos Orzamentos Participativos que seguen pendentes e que tiñan orzamento asignado María Rozas salientou tamén a instalación de paneis de comunicación social (72.000 euros) ou a mellora da sinaléctica do rural (80.000 euros).
Un Goberno que teme a participación
María Rozas aproveitou para volver lamentar “a involución que supuxo o regreso de Bugallo á alcaldía en termos de participación da veciñanza, unha involución que tén unha das súas principais mostras na decisión do Goberno do PSOE de ignorar un mecanismo que cada vez tén unha mellor acollida como son os orzamentos participativos”. Ao respecto, a concelleira de Compostela Aberta lembrou que a alcaldesa socialista da Coruña acordou recuperar esta ferramenta para o ano 2022, e así os coruñeses e coruñesas poderán decidir en que se gastan 2,5 millóns de euros de fondos municipais. Rozas apuntou que “mesmo un alcalde como o de Madrid, o popular José Luis Martínez-Almeida, mantivo os orzamentos participativos, cunha dotación de cen millóns de euros en 2021”. Para a concelleira, é lamentable que no caso de Santiago “Bugallo siga argumentando que os orzamentos participativos non foron representativos nin permitiron desenvolver as actuacións máis acaídas, porque iso só significa que o alcalde non respecta a vontade da cidadanía nin lles outorga aos veciños e veciñas a capacidade de decidir cales son os proxectos que Santiago necesita”
