María Rozas: “Bugallo non lle sacou nin un só compromiso firme a Rueda, só 24 horas despois de coñecer uns orzamentos que menosprezan a Santiago”

  • A portavoz de Compostela Aberta lamenta que Xunta e Concello agardaran a que estea en marcha a ampliación do CHUS para empezar a estudar melloras na mobilidade
  • A concelleira lembra que o PSOE “mudou a súa postura sobre a taxa turística hai un ano, pero non foi quen de concretarlle unha proposta a Rueda”

“En só 48 horas, coa presentación dos orzamentos autonómicos de 2023 e coa reunión entre Alfonso Rueda e Bugallo, quedou constatado o menosprezo da Xunta por Santiago e a nula capacidade de presión do alcalde compostelán en defensa dos intereses da capital galega”. É a valoración da portavoz municipal de Compostela Aberta, María Rozas, tras coñecerse os presupostos do vindeiro ano “que esquecen todos os compromisos e todas as necesidades de Santiago”, e despois da xuntanza que mantiveron o presidente da Xunta e o rexedor santiagués “que non foi máis que unha declaración de intencións, cun claro pacto de non agresión, que en nada vai beneficiar á veciñanza de Compostela”.

María Rozas mostrou a súa decepción despois da reunión entre o presidente da Xunta e o alcalde de Santiago, “que non se traduciu en ningún compromiso firme, máis alá de que Rueda di que estudará algunhas peticións sobre as que xa debera ter unha posición avanzada, por seren temas que levan moitas semanas, mesmo anos, na axenda”. A voceira de CA preguntouse se esta indefinición “responde á intención do presidente da Xunta de botar balóns fóra, ou pode atribuirse a que Bugallo non fixo os deberes e non acudiu á reunión coas súas demandas suficientemente definidas e concretadas”.

Aparcamento do Clínico 

A portavoz municipal de Compostela Aberta cualificou de “cortina de fume electoralista” o anuncio de que Xunta e Concello asinarán un convenio para solucionar os problemas de accesibilidade e mobilidade no CHUS. Para María Rozas, “é incomprensible que Rueda e Bugallo falen ainda de estudar as necesidades de aparcamento do Clínico e de posibles mudanzas nos seus accesos cando xa está en marcha a licitación da ampliación do Hospital”. A concelleira lamentou que o alcalde, “se percate agora, transcorridos máis de tres anos de mandato, dunha necesidade que o seu predecesor Martiño Noriega puxo reiteradamente sobre a mesa de Feijóo desde o ano 2018, que o propio Sergas recoñeceu no Plan Funcional para a ampliación do CHUS que aprobou en marzo de 2019, e que el quixo maquillar ao longo do último ano, afirmando que había que elixir entre máis quirófanos ou prazas de estacionamento”.

Ademais, María Rozas considerou “pouco tranquilizador” que Bugallo presuma dun convenio que dirá que a Xunta non se opón a participar no tema do aparcamento do Clínico e o Concello non se opón a participar no tema dos accesos ao hospital, “porque iso non equivale en absoluto a que Rueda se comprometera a financiar a construción do parking, como sí fixo noutras cidades galegas que están tamén en proceso de ampliación dos seus hospitais, como é o caso da Coruña. Para a portavoz de Compostela Aberta, “a día de hoxe segue sendo unha incógnita se haberá novo estacionamento para o CHUS e, no caso de que chegue a habelo, non sabemos quen vai pagar e se estará listo para cando remate a ampliación do hospital, en 2026”.

Taxa turística

En relación á taxa turística, María Rozas volveu felicitar a Bugallo “por terse autoemendado, trasladándolle ao presidente da Xunta unha petición que tamén fora formulada xa en 2017 polo alcalde Martiño Noriega, e coa que el e o PSOE foran moi críticos”. Ao mesmo tempo, foi moi crítica porque “non se entende que o rexedor non fora cos deberes feitos á reunión con Rueda, que lle pediu unha proposta máis concreta sobre a taxa”. Rozas lembrou que “o cambio de postura do PSOE sobre a taxa turística remóntase a outubro de 2021, e neste ano o Goberno de Bugallo tivo moito tempo para concretar a súa proposta”. A concelleira de Compostela Aberta mostrouse moi escéptica sobre os prazos para a implantación da taxa, “porque o alcalde di que precisa tres meses para elaborar unha proposta, e temos moitas mostras de que cando Bugallo di tres meses poden ser tres anos”.

Orzamentos autonómicos de 2023

Do mesmo xeito, María Rozas tamén considerou “un brinde ao sol” o anuncio de que a Xunta podería estudar un incremento da partida da capitalidade, “porque se tivera esa vontade non tería presentado uns orzamentos autonómicos de 2023 que conxelan esa achega, e que apenas incrementan a dotación para o Consorcio, constatando que Santiago non verá eses 280 millóns de investimentos comprometidos hai máis dun ano polo Real Padroado”.

Para María Rozas, a reunión entre Bugallo e o presidente da Xunta foi “unha oportunidade perdida para fixar compromisos concretos con Santiago, pero tamén para que Alfonso Rueda asumira a necesidade de mellorar as partidas dos orzamentos autonómicos de 2023 en relación á capital galega”. A concelleira de CA insistiu en que “alén da ampliación do Hospital Clínico, non hai partidas importantes para Compostela, e iso demostra o menosprezo da Xunta, e tamén a nula capacidade de presión dun alcalde, Bugallo, que leva tres anos  de mandato presumindo dunhas supostas magníficas relacións co Goberno galego que non se están traducindo en ningunha ventaxa para a veciñanza”.

Novas
relacionadas

María Rozas denuncia “a falta de impulso político e de capacidade de xestión da concellería de Deportes” nun encontro con entidades deportivas de Santiago

A candidata de Compostela Aberta considera que “remata un mandato en branco, sen avances nas novas infraestructuras deportivas nin en mantemento, e con continuos problemas na tramitación das subvencións municipais”

María Rozas no COAG: “Precisamos unha administración máis eficiente  e un Goberno máis dialogante para resolver os retos de Santiago”

A portavoz municipal mantén unha xuntanza cunha representación do Colexio Oficial de Arquitectos para presentar as propostas de Compostela Aberta en materia de mobilidade, mellora dos espazos públicos ou vivenda “despois dun mandato perdido para a veciñanza”

María Rozas: “Se quere pechar o caso Pichel, Bugallo perdeu onte unha gran oportunidade de dar explicacións e despexar dúbidas no Pleno”

A portavoz de Compostela Aberta lamenta que o Goberno non respondera a ningunha das preguntas que leva formulando máis de dez días

CA insta ao Pleno a defender os dereitos sexuais e reprodutivos das mulleres e a rexeitar protocolos antiabortistas

Marta Lois advirte que “o acontecido en Castela e León semella non ser un caso illado senón responder a un intento de retroceder nas conquistas dos dereitos das mulleres co que o presidente da Xunta se tén mostrado comprensivo”

PARTICIPA

gRUPOS
DE TRABALLO

Selecciona a túa preferenza*
Podes participar en varios Grupos de Traballo