- A candidata sinala que “CA non renuncia a gobernar, non renuncia a ser a ferramenta dos veciños e veciñas que queren participar nas decisións e que estiveron ignorados nos últimos catro anos”
“Santiago non pode retroceder ao pasado cun goberno do PP, pero o seu futuro non o pode escribir Bugallo”. Díxoo hoxe María Rozas, no acto de presentación pública da lista coa que Compostela Aberta concorre ás eleccións municipais do 28 de maio. A candidata á alcaldía insistiu en que “CA é un espazo de esperanza, é a garantía de que na capital galega se desenvolvan políticas progresistas, é a mostra de que outra maneira de estar na política é posible, e é o exemplo de que se pode gobernar dándolle voz á veciñanza”.
A Sala Capitol acolleu esta tarde a presentación pública da candidatura completa de Compostela Aberta, á que asistiron numerosos representantes do tecido asociativo e veciñal de Santiago. No acto tamén se deron a coñecer algunhas das claves do programa electoral de CA, “un programa que nace de escoitar á veciñanza, que é o reflexo do modelo de cidade que levamos oito anos defendendo, e que está cheo de propostas transformadoras que só se van facer con Compostela Aberta”.
María Rozas reiterou o seu orgullo por encabezar unha candidatura “que evidencia o enorme capital humano e político de Compostela Aberta, unha lista que combina experiencia institucional con participación no movemento asociativo que constrúe Santiago, no activismo veciñal, social, cultural ou sindical”. Tamén salientou a presenza na candidatura dos exconcelleiros do Goberno de CA e de Martiño Noriega, “porque toca reivindicar o traballo feito no pasado mandato, do que debemos sentirnos orgullosas malia os erros; toca lembrar que sen Compostela Aberta non teriamos estación intermodal, nin nova EDAR, nin renda de garantía básica, nin regulación dos pisos turísticos, nin Casa das Mulleres Xohana Torres… porque os anos de Compostela Aberta non foron anos perdidos, foron anos de avances como serán os que están por vir”.
Compostela Aberta, ferramenta dunha veciñanza que quere decidir
María Rozas lembrou que “Compostela Aberta naceu para devolverlle a dignidade a Santiago despois do nefasto goberno dos tres alcaldes do PP, e agora non permitiremos un regreso a 2011, porque o Partido Popular nunca é unha boa opción e non nos deixamos enganar polas súas promesas inviables”. A candidata de Compostela Aberta advertiu que “o futuro de Santiago tampouco o pode escribir Bugallo, porque xa nos chegou este mandato para asistir á caída do mito dos bos xestores e para sufrir os retrocesos en materia de diálogo, participación e transparencia”. Rozas mostrouse convencida de que “Compostela Aberta é o único espazo para a esperanza, somos a ferramenta dos veciños e veciñas que queren participar da vida do seu concello, que queren opinar sobre en que se gastan os cartos que son de todas, que queren decidir o seu futuro”
Políticas valentes, sen ataduras
María Rozas insistiu en que “Compostela Aberta non renuncia a gobernar para poñer en marcha políticas valentes que ningunha outra organización vai impulsar, porque somos os únicos que non temos ataduras”. Nesa liña, adiantou que “non renunciamos a recuperar a xestión da auga, non por unha cuestión ideolóxica, senón porque os datos e as experiencias doutras cidades demostran que é o mellor para a veciñanza; e non renunciamos a seguir avanzando nun modelo turístico sustentable, non pola turismofobia da que nos quixeron acusar, senón porque queremos un Santiago que poida ser vivido”
A candidata de CA tamén puxo o foco na necesidade de apostar no próximo mandato “por un Santiago para vivir e ser vivido, por unha cidade coidadora, que volva ser o epicentro do feminismo, que recupere o seu pulo cultural, e no que se volva falar de medio ambiente”.
Candidatura
1.María Rozas Pérez
2. Xan Duro Fernández
3. Comba Campoi García
4. Miguel Penas Rodríguez
5. Graciela Carro Asorey
6. Javier García Pérez
7. Marisa Álvarez Garea
8. Jaime Bello González
9. Luisa Pasín Mato
10. Marta Lois González
11. Pilar Gil Romero
12. Flora Miranda
13. André Seoane
14. Eli Cabeza
15. Antonio Pérez Casas
16. Natalia Paleo
17. Josinho Mera
18. Soledad García Río
19. Rafa Peña
20. Noa Morales
21. Manolo Dios
22. Concha Fernández
23. Carminha Naveiro
24. Marilar Aleixandre
25. Martiño Noriega
SUPLENCIAS
- Mariajo Bóveda,
- Iván Rodríguez
- Rocío Núñez
- Jesús Ribeira
- María Gigirey
- Pablo Souto
- Cristina Amor
- Pili Pérez
- Antía Soto
- Carlos Pardo
