- “Polo que importa”, lema electoral de Compostela Aberta “que é a candidatura da xente, que non entende a política sen escoitar e ir da man dunha veciñanza que se sente esquecida e apartada”
“Compostela Aberta é a candidatura da xente, estamos aquí polo que de verdade lles importa aos veciños e veciñas, sen ataduras e sen hipotecas, e por iso non renunciamos a nada”. Así o dixo hoxe a candidata de CA á alcaldía, durante o acto de apertura da campaña electoral. María Rozas, que estivo arroupada polo exalcalde Martiño Noriega e por boa parte da lista, reiterou que “Compostela Aberta é o espazo da esperanza para unha veciñanza que quere que se goberne doutra maneira, que está farta de non ser escoitada e que quere ter un papel activo na construción do Santiago do futuro”.
Compostela Aberta comezou a campaña cun acto nas Casas Reais, ao carón do local electoral de CA, no que se descubriu o cartel e o lema electoral: “Polo que importa”. Na súa intervención, María Rozas lembrou que “Compostela Aberta está afeita a escoitar, lévao facendo desde 2015, e por iso sabemos ben que é o que lle preocupa á veciñanza, que é o que lle importa á cidadanía de Santiago, e por iso é polo que estamos aquí”. “Queremos que Santiago sexa un concello coidado e que nos coide; que todos os veciños e veciñas atopen en Compostela unha vivenda que poidan pagar; que ningunha persoa quede atrás pola falta de recursos; que a veciñanza do rural se sinta parte de Santiago; e que volvamos ser a capital cultural que fomos”, sinalou a candidata.
Valentía e honestidade
María Rozas incidiu en que “Compostela Aberta non renuncia a nada, non renuncia a gobernar coa honestidade e a valentía que só temos nós, que demostramos estando no Goberno e tamén estando na oposición, e que fan que sexamos o único garante de que en Santiago se impulsen políticas verdadeiramente transformadoras”. Nese sentido, a cabeza de lista advertiu que “CA non permitirá que Compostela volva aos anos negros do Partido Popular, pero tampouco se conforma cos anos grises de Bugallo, porque a nosa cidade merece moito máis”. Por iso, insistiu, “afrontamos esta campaña con todas as forzas, con todas as ganas e con toda a ilusión, sabendo que sodes moitos e moitas os que empurrades, porque estades fartas dun goberno que non escoita, e que se pón permanentemente de costas á veciñanza”
Unha candidata comprometida
No acto de inicio da campaña tamén participou o excalde Martiño Noriega, que salientou de María Rozas “a súa capacidade e o seu compromiso con Santiago”. O número 25 da lista de CA insistiu en que “a candidata de Compostela Aberta é garantía de solvencia, de seriedade, de diálogo”. Para Martiño Noriega, “María Rozas e Compostela Aberta son a única esperanza para o Santiago do futuro, para a Compostela que queremos”.
