- CA vén organizando encontros sectoriais baixo o lema “Falemos do que importa” para recoller as demandas e as propostas de asociacións e veciñanza
A candidata de Compostela Aberta á alcaldía mantivo onte un encontro con representantes de diferentes entidades deportivas de Santiago para facer balance dos últimos anos, presentar as propostas de CA, e recoller as súas demandas e achegas. María Rozas foi moi crítica co labor da concellería de Deportes neste mandato, “que finaliza practicamente en branco, sen avances nos grandes proxectos do departamento, e con continuos problemas na xestión das cuestións ordinarias, como a tramitación das subvencións aos clubs”.A xuntanza “Falemos de Deportes” enmárcase na serie de reunións sectoriais que a portavoz municipal está a manter nestas semanas con entidades e veciñanza, baixo o lema “Falemos do que importa”.
No encontro con María Rozas participaron máis dunha vintena de representantes de entidades deportivas de diferentes disciplinas como fútbol, baloncesto, balonmán, hockey, natación, tenis de mesa, ciclismo, fútbol gaélico, atletismo, natación ou xadrez. Os clubs puideron trasladar as súas demandas particulares, mais tamén mostraron moitas preocupacións comúns relativas ao mantemento e a escaseza de instalacións deportivas, a organización do seu uso, ou os problemas relacionados coa tramitación das subvencións municipais neste mandato. Tamén interviu Noa Morales, concelleira de Deportes no Goberno de Compostela Aberta.
Falta de xestión e de diálogo
María Rozas denunciou “a falta de impulso político na Concellería de Deportes ao longo deste mandato, que dificultou mesmo a xestión das cuestións máis ordinarias do departamento, como as subvencións municipais”. A candidata de Compostela Aberta lamentou “os atrasos no pago das axudas nominativas, que puxo en serios problemas de liquidez a moitas entidades; así como a demora na convocatoria das subvencións por concorrencia competitiva, que non se xustifica pola pandemia porque a de 2022, nunha situación de normalidade, non foi publicada ata o mes de outubro”. A concelleira explicou que “esta situación explícase fundamentalmente pola falta de interese do Goberno na área de Deportes”, e incidiu en que “é preciso reforzar o persoal do departamento, como fixo Compostela Aberta durante o pasado mandato, e retomar fórmulas que axilicen o pago de subvencións, como a do pago anticipado que tamén impulsamos desde o Goberno”.
Na mesma liña, María Rozas atribuiu “ao desleixo da concelleira de Deportes a ralentización dos investimentos na mellora do mantemento das instalacións deportivas, con proxectos que quedaron aprobados no anterior mandato e que este Goberno non desbloqueou”. Un exemplo significativo, apuntou, é a mellora do pavillón do Quiroga Palacios, “cun proxecto que deixamos aprobado e que incluímos nos acordos para a viabilización dos orzamentos que asinamos co PSOE, pero que non se iniciou mentres que os clubs que utilizan as instalacións denuncian goteiras que estragan o seu material”. En canto ás novas actuacións, a candidata de CA lamentou que “seguimos sen noticias da Cidade da Raqueta e, sobre todo, da nova piscina de Santa Marta, que nos preocupa especialmente porque o Goberno tén apuntado a súa intención de impulsar un modelo concesionado co que non concordamos, porque entendemos que estas instalacións deben ser públicas para garantir o seu uso por parte da veciñanza e tamén dos clubs que sofren a falta de instalacións para adestrar deportes de auga”. En materia de investimentos, na xuntanza de onte tamén se falou das anunciadas reformas dos pavillóns de Santa Isabel e Vite “sobre as que os clubs non teñen información e empezan a temer como van afectar as obras aos seus adestramentos e sobre todo ás súas competicións oficiais”.
Maior pulo á promoción do deporte
Por último, María Rozas referiuse á falta de iniciativas para a difusión e promoción do deporte, sobre todo entre crianzas e mocidade. Nese sentido, lamentou que este Goberno non retomara a celebración da Festa do Deporte impulsada durante o pasado mandato, “que era unha gran oportunidade para a promoción de disciplinas minoritarias, sobre todo entre os escolares”, que non se mantiveran os acordos con diferentes Federacións como as de Squash, Loita Olímpica ou Xadrez para a difusión destes deportes nos colexios, e mesmo que non houbera un esforzo para atraer grandes competicións a Santiago que sí se celebran noutras cidades galegas. Nesa liña, a candidata de CA lembrou os eventos que se celebraron na cidade durante o pasado mandato, “como o mundial de xadrez de categorías inferiores, que trouxo a Compostela a unhas 3.000 persoas e deixou un impacto económico estimado en cinco millóns de euros, ademais no mes de novembro, na tempada baixa para o turismo”.