- A concelleira pídelle ao alcalde que aclare se a Policía Local vai intervir no recinto hospitalario, tal e como onte lle reclamou a Xunta
A portavoz municipal de Compostela Aberta, María Rozas, foi hoxe moi crítica coa reunión celebrada onte entre o alcalde e a conselleira de Infraestruturas “anunciada para desbloquear o aparcamento do Hospital Clínico, pero que só serviu para que as dúas partes intentaran lavar a súa imaxe sen solucionar absolutamente nada”. A concelleira incidiu en que “é evidente que a reunión rematou sen acordos, e non hai mellor mostra diso que comparar as notas informativas difundidas por Concello e Xunta nas que, curiosamente, non se incluiu ningunha fotografía da xuntanza”. Para Rozas, “estamos asistindo á fin do romance entre Bugallo e a Xunta do PP, e a un novo episodio do uso partidario das institucións públicas, a só tres meses das eleccións municipais”.
María Rozas incidiu en que “ainda que Bugallo nos diga que acordou coa Consellería traballar conxuntamente para ter adoptada antes do verán unha decisión sobre a construción do novo parking, a realidade é que o único ao que se comprometeu a Xunta é a facer un estudo de mobilidade, estudo que o propio alcalde consideraba innecesario hai só unhas semanas porque, afirmaba, o problema de aparcamento no CHUS víase a simple vista”. A portavoz municipal de Compostela Aberta tamén cuestionou os prazos achegados na xuntanza de onte, “porque é unha tomadura de pelo que alcalde e conselleira de Infraestruturas adíen a toma de decisións sobre o aparcamento a dentro de catro meses, porque, como o propio Bugallo tén indicado, este é un problema urxente”. Para a concelleira, “é evidente que o que nos están a dicir Bugallo e Ethel Vázquez é que o tema do parking do CHUS falarase despois das eleccións municipais, que son dentro de tres meses”. Nesa liña, preguntouse “que vai pasar coa parcela que o Goberno local acordou en Xunta de Goberno cederlle á Consellería de Sanidade, que tén seis meses para aceptar ou non esa cesión”.
A portavoz de CA tamén lle pediu ao alcalde que aclare “como vai o Concello a colaborar na ordenación do tráfico e do estacionamento no recinto hospitalario, e se a Policía Local vai intervir neste ámbito, tal e como a Xunta lle requiriu onte”. Na práctica, sinalou María Rozas, “o que parece demandar o Goberno galego é que empecen as multas aos vehículos mal aparcados na contorna do Clínico, pero sen procurar ningunha solución para os usuarios do hospital”.
María Rozas insistiu en que “a actuación de Bugallo e da Xunta en torno ao novo aparcamento do Clínico está a ser esperpéntica, e as dúas partes veñen demostrando moverse por intereses que son totalmente alleos aos problemas da veciñanza”. A concelleira reiterou que “o alcalde tardou demasiado tempo en abandonar a súa sumisión ao Goberno de Feijóo, tardou demasiado tempo en reclamar o aparcamento vinculado ao hospital que a Xunta sí construiu noutras cidades, e tardou demasiado tempo en recoñecer que a proposta que Compostela Aberta levaba defendendo oito anos era a acaída para solucionar o problema do parking”. Ao tempo, insistiu, “o PP segue facendo un uso partidario da Xunta de Galicia, e do mesmo xeito que no pasado mandato se negou a construir o aparcamento que lle reclamou reiteradamente o alcalde Martiño Noriega, e agora dálle largas a Bugallo, mantendo a discriminación a Santiago”.
