Compostela Aberta pedirá no próximo Pleno que o Concello asuma o proxecto para a mellora da mobilidade e da seguridade viaria no contorno de Lamas de Abade que elaborou a ANPA do IES, e que conta co apoio dos outros centros educativos do barrio e da veciñanza do Castiñeiriño. A portavoz municipal de CA, María Rozas, sinalou que “esta actuación debe ser considerada prioritaria, e máis despois da actuación que vén de executar o Goberno de Bugallo e que non fixou outra cousa máis que empeorar a situación na zona”.
María Rozas explicou que Lamas de Abade presenta grandes problemas de mobilidade, por mor da concentración de varios centros educativos na zona: un CEIP, o IES Lamas de Abade, o Centro Integrado de Formación Profesional Compostela, a escola infantil Raiola, e mesmo o Centro de Educación Especial que xestiona Aspanaes. No pasado mandato, aprobáronse dúas propostas para este ámbito ao abeiro dos Orzamentos Participativos: a pasarela peonil entre o CEIP e o CIFP, que foi executada; e a mellora dos accesos aos centros educativos, que foi orzada en 136.000 euros pero que quedou pendente da concesión de permisos necesarios por parte doutra administración. Xa neste mandato, o Goberno de Bugallo acaba de acometer unha actuación, que custou 85.000 euros, “que tal e como denuncia a comunidade educativa non mellorou a situación, senón máis ben todo o contrario”.
Actuación contraproducente do Concello
A portavoz de Compostela Aberta explicou que a actuación acometida polo Goberno centrouse nas proximidades á entrada do CIFP. A primeira medida foi a de prohibir o tráfico de subida desde a rúa Lamas de Abade ata rúa Divina Pastora pola rúa Chaparra, convertindo en peonil o tramo desta vía que discorre paralelo ao peche perimetral do Centro de Formación Profesional. A cambio, acondicionouse unha pequena rotonda na confluencia entre esas tres rúas, “nun espazo no que é imposible que os autobuses fagan o xiro sen maniobrar, coas complicacións que iso supón nunha zona escolar, e sobre todo nas horas punta de entrada e saída dos centros”.
Proxecto da ANPA do IES Lamas de Abade
Rozas explicou que a ANPA do IES Lamas de Abade ten encargado un proxecto para ordenar o tránsito rodado e peonil, que está orzado en case 166.000 euros e que contaría co apoio dos outros centros educativos e tamén da asociación veciñal do Castiñeiriño. A súa proposta pasa por permitir novamente o tránsito de subida pola rúa Chaparra, “acondicionando unha pequena pasarela peonil ata o CEIP, que requiriría a cesión de terreos do CIFP por parte da Consellería de Educación que, segundo sostén a ANPA, xa manifestou a súa dispoñibilidade”. Ademais, o proxecto prevé unha rotonda na confluencia das rúas Divina Pastora e Raiola, para axilizar a circulación neste punto no que coinciden os vehículos, sobre todo os autobuses, que se dirixen ao colexio de Infantil e Primaria, ao Instituto, ao xardín de infancia Raiola, e ao centro de Aspanaes. Tal e como propón a ANPA do IES, “esta actuación non só melloraría a mobilidade e a seguridade, senón que tamén permitiría dignificar o espazo público que rodea o cruceiro e a capela situados na zona”.
María Rozas reclamoulle ao Goberno que “atenda as peticións da ANPA do IES e do conxunto da comunidade educativa dos centros de Lamas de Abade, porque é evidente que os problemas de mobilidade non quedaron resoltos”. Para a portavoz de CA, “o acontecido nesta zona é unha moi boa mostra de que non se poden deseñar as obras desde os despachos, sen pisar rúa e sen falar cos colectivos que mellor coñecen as necesidades reais, porque o resultado está sendo que o Concello gastou 85.000 euros de fondos públicos para non solucionar ningún problema e para crear algúns novos”.
PODES LER AQUÍ A PROPOSICIÓN DO GRUPO MUNICIPAL DE COMPOSTELA ABERTA PARA A MELLORA DA MOBILIDADE NA CONTORNA DO ‘CAMPUS’ DE LAMAS DE ABADE
