- Rozas foi moi crítica coa xestión económica do actual Goberno “que tampouco tivo o impulso político preciso para unha boa implantación da administración electrónica”
María Rozas participou hoxe nun almorzo informativo co Club Financiero de Santiago para presentar o programa electoral de Compostela Aberta, no que estivo acompañada pola concelleira Marta Lois. A candidata á alcaldía explicou as propostas de CA en materia de reindustrialización, modernización da administración municipal ou xestión económica, pero tamén deu conta de medidas máis transversais para afrontar os grandes retos que tén por diante a capital galega, entre eles a mobilidade e a vivenda.
María Rozas reiterou a aposta de Compostela Aberta pola reindustrialización de Santiago, “porque cremos que temos un enorme potencial que tén que ser explotado, non podemos conformarnos con ser a capital administrativa e turística porque podemos ser moito máis”. Para iso, a candidata de CA incidiu na necesidade de “aproveitar o coñecemento xerado desde a nosa Universidade, como xa se fixo no pasado mandato, e tamén pola colaboración en iniciativas impulsadas tamén polo Goberno de CA como o biopolo da Sionlla”. Ademais, explicou algunhas das propostas incluidas no programa electoral de CA, como a creación dunha Oficina de captación e retención de empresas, que funcionaría como intermediaria para facilitar todos os trámites administrativos que teñan que realizar as empresas no Concello de Santiago. Vinculado a isto, Rozas recoñeceu que existe “un gravísimo problema cos prazos na tramitación de licenzas, e nós temos propostas para axilizalos, propostas que funcionan noutros concellos como o uso da plataforma Pasaxe, impulsada polo Colexio de Arquitectos e a Xunta”. Nesa liña, tamén puxo o foco nos problemas que está a xerar a administración electrónica, “non porque falle a solución técnica, senón porque falla o impulso político”. A candidata de CA comprometeuse a crear unha concellería específica de Modernización Administrativa “para corrixir estas eivas, que fai que Santiago siga estando vinte anos por detrás doutras cidades galegas”.
Pésima xestión económica
María Rozas foi tamén moi crítica coa xestión económica do Goberno de Bugallo, “que non resiste ningunha comparación co que se fixo no pasado mandato, e os datos están aí”. Nesa liña, a candidata de Compostela Aberta lembrou que “o Concello pechou 2022 con 24 millóns de euros sen gastar, dos que 14 millóns de euros son facturas pendentes; en 2018, tivemos 7 millóns de remanentes e 1 millón de facturas. Iso significa que non hai que buscar fórmulas máxicas, o que hai é que saber e ter capacidade para xestionar”. Relacionado con isto, a concelleira explicou que “este Goberno está incumprindo sistemáticamente o periodo medio de pago a provedores, xerando moitos problemas en pequenas empresas e autónomos, que xa non queren traballar para o Concello de Santiago porque saben o que poden tardar en cobrar”
Mobilidade e vivenda, retos de futuro
Na súa exposición, María Rozas tamén explicou que para Compostela Aberta dous dos principais retos que tén por diante a capital galega son a mobilidade e a vivenda. Sobre a primeira das cuestións, reiterou o malestar de CA “porque a día de hoxe seguimos sen coñecer cal é o modelo de transporte que recollen os pregos aprobados polio Goberno de Bugallo, e aínda que o alcalde dixo publicamente que se mantiñan as rutas deseñadas no seu momento por Compostela Aberta temos sospeitas de que iso non é así porque non se respectaron cuestións como o transporte a demanda para o rural”. Nesa liña, sinalou que “estaremos atentas a que se manteña a nosa proposta para o Polígono Tambre, cunha liña troncal cunha frecuencia de paso de 10 minutos”.
En canto á vivenda, María Rozas explicou que a aposta de Compostela Aberta pasa por recuperar a figura da empresa municipal de vivenda, “cunha nova orientación para que non se limite á promoción de vivenda a prezo taxado, como fixo no pasado, senón que tamén sexa activa na mobilización de vivenda baleira e o impulso á rehabilitación para poñer eses pisos en alugueiro a prezos accesibles, con condicións vantaxosas para determinados colectivos.
