A portavoz municipal de Compostela Aberta, María Rozas, esixiulle hoxe ao Goberno de Bugallo “que non agarde nin un día máis para adoptar medidas na nova minirotonda da rúa do Hórreo, tras confirmarse que é un risco para a seguridade viaria, tal e como denunciamos no último Pleno da Corporación”. Na pasada Noiteboa, un vehículo atravesou a glorieta, subiu á beirarrúa e acabou derrubando unha farola, o que provocou ademais un corte de luz nalgunhas rúas do Ensanche. A concelleira incidiu en que “máis alá das circunstancias particulares nas que se produciu o accidente, o acontecido evidencia que a rotonda é unha mala solución para este punto, cando menos tal e como está executada na actualidade”.
O accidente na rotonda do Hórreo, á altura de San Pedro de Mezonzo, produciuse na Noiteboa pasada, en torno á unha da mañá. Ao parecer, o conductor do vehículo non se percatou da presenza da glorieta, e acabouna atravesando por riba e derrubando parte dos bloques de cemento que a rodeaban. María Rozas incidiu en que “este incidente non nos causa ningunha sorpresa, máis ben ao contrario, porque é algo do que xa levabamos semanas advertindo, e que mesmo foi motivo de debate no Pleno do pasado mércores a partir dun rogo presentado por CA”. A concelleira lembrou que a petición de Compostela Aberta era “que o Concello tomara as medidas oportundas para garantir a seguridade viaria, retirando a actual rotonda e redactando un proxecto para unha actuación ben pensada, que mellore a circulación e non xere problemas onde non existían”. A resposta do concelleiro Gonzalo Muíños foi que a actuación non estaba concluída, porque levaba parello o traslado da marquesiña de autobús existente no lateral da glorieta, “mais queda demostrado que ese non é o principal problema da glorieta, que foi totalmente improvisada”.
Compre avaliar se realmente é necesaria esa rotonda, e de selo, a elaborar un proxecto que substitúa á chapuza actual
María Rozas lamentou que o Goberno “non escoitara nin a Compostela Aberta nin á veciñanza que leva semanas denunciando nas redes sociais que a rotonda é perigosa, pola súa configuración, polos erros no pintado, e mesmo pola falta de iluminación”. Para a portavoz de CA, “o Goberno non debe esperar a que aconteza outro accidente para reaccionar, asumir o seu erro, avaliar se é precisa unha rotonda nese punto e, se é así, elaborar un proxecto que teña en conta a configuración da vía e os fluxos de tráfico neste punto para deseñala”. “O que non podemos”, concluiu Rozas, “é manter unha glorieta que é unha chapuza e un pegote no medio do Hórreo ata que se produza un accidente de maiores consecuencias que o do sábado”.
