O Pazo de Raxoi acolleu o primeiro Pleno do debate sobre o estado do municipio deste mandato, unha sesión na que María Rozas interviu para facer balance do traballo que ven desenvolvendo Compostela Aberta desde o Goberno. A portavoz municipal de CA explicou que “estamos a cumprir o acordo de goberno asinado co BNG hai ano e medio, no que acordabamos poñer o foco nos dereitos sociais, a conciliación, o emprego de calidade, o reequilibrio territorial ou a igualdade”.
Un Santiago máis social
A tenenta de alcaldesa salientou, en primeiro lugar, os avances en materia social. María Rozas destacou o incremento do orzamento do Servizo de Axuda no Fogar nun 73%, ata os 6,3 millóns de euros anuais, e o aumento do 40% da partida destinada a bolsas de comedor escolar, material e actividades extraescolares, ata 1,1 millóns de euros. Este reforzo, explicou, “permitiunos conceder 2.000 axudas, case 600 máis que no curso anterior, e chegar ao 20% dos nenos e nenas de Santiago”.
Ao longo deste ano, os retos da Concellaría de Dereitos e Servizos Sociais serán a posta en marcha do servizo Xantar na Casa, unha vez asinado o convenio coa Xunta; e a apertura do Centro de Atención Integral ás Personas sen Fogar. Con respecto a este equipamento, María Rozas monstrou o seu orgullo “porque este Goberno retomou a concepción inicial do centro, durante o mandato de Compostela Aberta”.
A tenenta de alcaldesa tamén se comprometeu a iniciar “en canto sexa posible orzamentariamente” a Casa dos Maiores e centro sociocultural do Ensanche; e lembrou o obxectivo de redactar o proxecto da Factoría Moza”, que se incluirá na estratexia EDIL coa que o Concello pretende captar fondos europeos para rexenerar a zona norte de Santiago.
Durante a súa intervención, a portavoz de Compostela Aberta anunciou que o departamento de Emprego vén de recibir unha subvención de 1,8 millóns de euros de fondos europeos que permitirá poñer en marcha un ambicioso programa formativo no que se van investir un total de 3 millóns de euros. Trátase do proxecto Minerva, do que se beneficiarán case un milleiro de persoas.
O reto da mobilidade
A tenenta de alcaldesa tamén se referiu no debate sobre o estado do municipio aos avances en materia de mobilidade no ano e medio que levamos de mandato: a aprobación do PMUS e da nova ordenanza de Circulación, a implantación da Zona de Baixas Emisións na área histórica, ou a mellora do control de accesos á zona histórica.
María Rozas sinalou que os grandes obxectivos para 2025 en materia de mobilidade serán a licitación do servizo de transporte urbano, a xestión directa do aparcamento da Praza de Galicia, e a creación das 29 novas licenzas de taxi que vén de autorizar a Xunta a petición da Concellaría de Mobilidade que dirixe Xan Duro.
Orgullo do legado de CA
No debate sobre o estado do municipio, María Rozas reivindicou o traballo de Compostela Aberta, tanto na actualidade, como no mandato de 2015. Nese sentido, lembrou que o legado do Goberno de CA en solitario son “grandes infraestruturas como a EDAR ou a intermodal, hoxe en obras porque Compostela Aberta asinou os correspondentes convenios; pero tamén outras cuestións como os primeiros pasos na regulación dos pisos turísticos”.
Maria Rozas saía así ao paso das críticas do portavoz do PP, ao que lle lembrou que “o Partido Popular gobernou con maioría absoluta en Santiago, e acabouno facendo con concelleiros non electos que non foran votados por ninguén”.
