- Rozas reivindica o traballo feito no Goberno e na oposición por Compostela Aberta, “unha organización cun enorme capital humano e coas ideas moi claras sobre o Santiago que queremos”
- Marta Lois confirma a súa decisión persoal de non optar a encabezar a lista de CA
María Rozas encabezará a lista de Compostela Aberta para as próximas eleccións municipais. Anunciouse hoxe nunha rolda de prensa na que participaron o secretario de organización de CA, Xan Duro, a portavoz do grupo municipal, Marta Lois, e a propia María Rozas. A concelleira explicou que decidiu dar este paso “con orgullo e responsabilidade, reivindicando o traballo feito por Compostela Aberta e o noso capital humano, tendo claro como é o Santiago que queremos, e desde o convencemento da decepción da veciñanza co Goberno de Bugallo, tras a caída do mito dos bos xestores”.
María Rozas presentou a súa candidatura para encabezar a lista de Compostela Aberta nas próximas eleccións nun proceso que rematou na noite do pasado venres, e do que hoxe deron conta o secretario de organización e a voceira do grupo municipal de CA. No acto, Rozas estivo arroupada polo grupo municipal, por integrantes da coordinadora, e tamén por destacados membros de Compostela Aberta como o exalcalde Martiño Noriega. A súa candidatura será ratificada agora pola asemblea de CA, e abriráse un prazo de tres meses para configurar o primeiro tramo da lista para as próximas elecións municipais.
Orgullo do traballo feito, e ideas claras para o futuro
María Rozas
María Rozas agradeceu o apoio recibido nestas últimas semanas “por todas e cada unha das persoas de Compostela Aberta ás que lle fun comunicando a decisión de presentar a miña candidatura, unha decisión moi reflexionada, que tomo con moito orgullo pero tamén cun gran sentimento de responsabilidade”. A candidata incidiu en que dá este paso “sendo coñecedora da enorme valía e do capital humano da nosa organización, que tén moito que achegar á política municipal e que debe seguir reivindicando o feito no mandato no que fomos no Goberno, que agora desde a calma é percibido con moito máis recoñecemento mesmo polos máis escépticos”. Tamén puxo en valor “o traballo de CA nestes tres anos na oposición, nos que percibimos moita decepción co Goberno de Bugallo, unha vez caído o mito dos bos xestores mesmo para os máis crentes”.
A concelleira explicou que “teño claros cales son os meus valores, e cales son os valores de Compostela Aberta, que é o que queremos para Santiago”. Nesa liña, María Rozas insistiu en que “temos un proxecto claro de cidade, que se basea en recuperar o protagonismo das persoas, na participación e no diálogo, na transparencia, nas políticas sociais, na xestión económica seria e na nosa honestidade”. A candidata incidiu en que “temos un equipo serio que pode afrontar un contexto complicado, e somos o único proxecto que fai unha verdadeira aposta polas políticas municipais transformadoras”.
Agradecemento a Marta Lois
María Rozas tamén expresou o seu agradecemento ao traballo feito “tanto no Goberno como na oposición”, pola portavoz municipal, Marta Lois. “que sempre será unha das imprescindibles na nosa organización”. Pola súa parte, a voceira insistiu en que a súa decisión de non candidatarse para encabezar a lista de Compostela Aberta nas próximas eleccións municipais “está relacionada coa necesidade de recuperar certa sustentabilidade entre a vida persoal, familiar e profesional, e non significa que abandone nin a miña implicación con CA nin o meu traballo institucional”. Marta Lois reiterou que “tal e como lle comuniquei á militancia de Compostela Aberta nunha carta nesta mesma fin de semana, esta decisión é froito dunha reflexión persoal, non significa un adeus senón un punto de inflexión, desde o convencemento de que María Rozas é a mellor candidata posible para ser a próxima alcaldesa de Santiago”.
