- Os representantes dos traballadores denuncian que seis meses despois da entrada en vigor do contrato seguen faltando o persoal e a maquinaria establecidos nos pregos
A portavoz municipal de Compostela Aberta instou hoxe ao Goberno de Bugallo “a vixiar o correcto cumprimento do contrato da recollida do lixo e limpeza viaria, diante das denuncias do comité de empresa sobre a falta de persoal e de maquinaria”. María Rozas lembrou que o próximo luns cúmprense seis meses desde a entrada en vigor da nova concesión, “e os problemas que relatan os traballadores agraváronse desde maio, e a falta de respostas do alcalde e da concelleira Mila Castro é polo tanto máis preocupante que hai seis meses”.
Os tres grupos da oposición levarán ao Pleno deste mes unha moción conxunta para reclamarlle ao Goberno que controle e garanta o estrito cumprimento do prego de condicións do contrato da recollida do lixo, que entrou en vigor o pasado 21 de maio. Así o acordaron nunha xuntanza celebrada onte con representantes do comité de empresa de Urbaser, que relataron unha serie de deficiencias no servizo derivadas da falta de personal e de maquinaria.
Falta de persoal
María Rozas explicou que “o comité de empresa segue denunciando o incumprimento do prego de condicións en relación aos medios persoais, xa que dos 157 operarios establecidos para o servizo na actualidade están traballando 137, incluídos os que foron contratados para suplir baixas”. A voceira de Compostela Aberta lembrou que “coa entrada en vigor do novo contrato, a concelleira Mila Castro asegurou que a finais do mes de maio o servizo estaría funcionando coas 157 persoas establecidas no prego, e comprometeuse a que o Goberno estaría vixiante ao respecto”.
Déficit de maquinaria
Do mesmo xeito, o comité de empresa trasladou as súas queixas en relación aos medios materiais cos que se está prestando o servizo de recollida do lixo e limpeza viaria. María Rozas explicou que os representantes dos traballadores denunciaron que “seguen sen chegar todas as máquinas comprometidas no prego do contrato, e a día de hoxe seguen sen estrear o único lavabeirarrúas novo que chegou a Santiago, así como as sete illas móbiles coas súas respectivas cabezas tractoras”. Tamén asegura que o único camión de carga lateral incorporado ao servizo “non cumpre o prego de condicións do concurso porque é de diesel e non de gas como estaba establecido”. A portavoz de Compostela Aberta explicou que “desde maio tamén se introduciu maquinaria usada que se atopa en moi mal estado, como un camión de carga traseira que antes utilizadaba a empresa da recollida do papel, ou mesmo unha fregadora que non se utiliza porque está sen freos”. Tampouco se está cumprindo o prego, segundo o comité, no que tén que ver coa renovación das illas soterradas.
María Rozas pediulle ao Goberno que explique cal é a situación, “porque Mila Castro informou publicamente de que no mes de novembro chegarían algúns camións novos para a recollida, mentres que no caso da maquinaria máis lixeira, a concelleira fixou un prazo de entrega de seis meses desde que se fixera o pedido en marzo, isto é, ata o pasado mes de setembro”. “Polo que relata o comité de empresa”, sinalou a portavoz de CA, “non se están cumprindo os pregos, e tampouco se están respectando os prazos de entrega do material dos que falou a concelleira responsable en maio”.
Descoordinación do servizo
Máis alá dos medios materiais e humanos, o Comité de Empresa denunciou “a absoluta descoordinación do servizo e a imposición de novas normas por parte da empresa, que suporían a contratación de novo persoal para cubrir os domingos e festivos e a eliminación da bolsa de traballo que establece a orde de contratación”. Por último, os representantes dos traballadores volveron demandar a mellora dos vestiarios da rúa Pitelos, acondicionando unha zona feminina e outra masculina.
