• Esta ferramenta “debe ser o seguinte paso tras a implantación da administración electrónica, e xa funciona exitosamente noutras cidades de todo o Estado”
  • A concelleira de Compostela Aberta sinala que a tarxeta cidadá “permitiría centralizar o acceso a diferentes servizos públicos e o seu pagamento” 

María Rozas instou hoxe ao Goberno a estudar a implantación dunha tarxeta cidadá que lles facilite ás persoas empadroadas en Santiago o acceso aos servizos municipais e o pagamento daqueles que non son gratuítos e, en xeral, que simplifique a realización dos diferentes trámites coa administración local. A concelleira de Compostela Aberta defenderá no próximo Pleno unha moción ao respecto, na que lembra que “os avances dos últimos anos na implantación da administración electrónica permiten afrontar agora a creación desta ferramenta, que funciona exitosamente noutros concellos de todo o Estado”.

María Rozas sinalou que “a tarxeta cidadá debe ser o seguinte paso, despois da posta en marcha da administración electrónica, que se iniciou no pasado mandato no Concello de Santiago, con moitos anos de atraso con respecto a outras administracións locais”. A concelleira de Compostela Aberta incidiu en que “esta ferramenta non é especialmente novidosa nin complexa, porque xa leva tempo funcionando noutras cidades de todo o Estado, mesmo nalgúns concellos galegos como Lugo, Vigo ou A Coruña”.  

Facilitar a vida da cidadanía

A concelleira de Compostela Aberta explicou que a tarxeta cidadá “permitiría que as persoas empadroadas en Santiago accedan aos servizos municipais, realicen diferentes pagamentos, consulten datos, ou accedan á administración electrónica”. Tal e como acontece noutras cidades, con esta ferramenta, que se podería usar de xeito físico ou virtual, poderíase cargar o bonobús do transporte público, pagar a ORA ou os aparcamentos públicos, ou reservar billetes para actividades culturais. Tamén permitiría acceder directamente á administración electrónica e á carpeta cidadá para xestionar trámites relacionados co padrón, coas taxas e tributos ou co pago de multas. 

María Rozas sinalou que “a posta en marcha da tarxeta simplificaría algúns trámites, de xeito que non só sería unha vantaxe para a cidadanía senón tamén para a propia xestión administrativa interna do Concello, e mesmo se podería traducir nun aforro para a administración pública porque se unificaría información de diferentes departamentos”. Ademais, incidiu a concelleira de Compostela Aberta, “a tarxeta abriría a posibilidade de habilitar descontos diferenciados no pagamento dos servizos non gratuítos en función da renda e a situación socioeconómica das familias, a través dunha ordenanza, de xeito fácil e sen a farragosa burocracia”.

PODES CONSULTAR AQUÍ A PROPOSICIÓN DO GRUPO MUNICIPAL DE COMPOSTELA ABERTA PARA A IMPLANTACIÓN DA TARXETA CIDADÁ MUNICIPAL DE SANTIAGO

Uso de cookies

Este sitio web utiliza cookies para que vostede teña a mellor experiencia de usuario. Se continúa a navegar, está dando o seu consentimento na aceptación das devanditas cookies e a nosa política de cookies,Para máis información, faga click no enlace. ACEPTAR

Aviso de cookies